WILLEMSTAD.- Reakshonando riba deklarashon ku Minister Jacintha Constancia a hasi, Smoc a indiká ku nan lo sigui hasi e trabou ku gobièrnu no ta hasiendo. Smoc a duna di konosé ku nan a tuma nota di e deklarashon ku Constancia a hasi durante di un rueda di Prensa tokante di e kaso ku a wòrdu tratá den korte, Smoc versus gobièrnu. Hues a ordená ku gobièrnu pa denter di 4 siman manda un karta pa refineria Isla, indikando e violashon di Isla ku ta wòrdu menshoná, huntu ku e eksigensianan ku Isla mester pone un fin na e violashonnan aki, ku un straf di 500 mil florin pa siman, ku un máksimo di 50 mion.
SMOC a bisa ku no opstante ku nan no tabata invitá na e rueda di prensa, nan a komprondé ku e minister a bisa ku gobièrnu mester di mas tempu pa kontestá e preguntanan tékniko ku ta bin dilanti den e veredikto. Si tin preguntanan tékniko ta Isla ta esun ku mester kontestá nan, no gobièrnu. Riba e parti ku Minister a puntra kiko SMOC lo hasi ku e kantidat di plaka ku nan lo risibí, esaki ta hopi fásil pa splika segun SMOC. Nos ta un fundashon ku tin e úniko meta pa ataká e polushon di Isla, duna konseho i deliberá ku gobièrnu i organisashon di medioambiente i duna e komunidat informashon. Tur e sèn ku SMOC risibí lo wòrdu poné pa e mesun meta. Mesun kos ku e plakanan ku a haña di spònser partikular ku a wòrdu usá pa kubri gastu di abogado, steker, presentashonnan i embolbimentu di ekspertonan. E miembronan di Smoc ta voluntarionan ku no ta risibí niun klase di kontribushon finansiero.
Gobièrnu mester ta kontentu ku sentensia, ku ta mustra klaramente kua ta e violashonnan ku Isla a hasi manera ta indiká den e pèrmit. E departamentu di medioambiente mester a hasi esaki, pero nan ta un organisashon suak, no opstante ku Ulanda a hinka 1 mion florin den e departamentu pa mehorashon. Awor Hues a hasi e trabou pa Minister , e úniko kos ku e mester hasi awor ta saka un kopia i hink’é den un ènvelòp i manda pa Isla. Nada mas i nada ménos. Si gobièrnu tin mas pregunta Smoc ta disponibel pa kontestá, manera ku a bin ta sosodé fo’i 2001 ora ku a lanta e fundashon.
