Ta nesesario ku doño di e instalashonnan di refineria ta duna klaridat apsoluto riba futuro di e refineria. Esei Manuel Medina, direktor general di e gigante di zeta Venezolano PdVSA, ta bisa.
Sentensianan Isla
For di 2005 PdVSA tin di aber ku dos prosedura di Moveshon Medio Ambiente i un kantidat di habitante bibá bou di huma di e refineria.
Di un banda ta trata di un prosedura sivil ku a kuminsá na 2006, ku sentensianan intermedio i proseduranan di apelashon, i un sentensia final den Apelashon dia 12 di yanüari 2010. Sentensia: Korte ta prohibí pa surpasá e medio anual SO2 di 80 mcg/m3 di Isla bou di pena di NAF 75 mion florin.
Di otro banda ta trata di un prosedura LAR (derecho atministrativo), ku a kuminsá na 2005 ku sentensianan intermedio i proseduranan di apelashon, i un sentensia final dia 1 di sèptèmber 2011. Sentensia: gobièrnu mester manda Isla un karta pa mas tardá 28 di sèptèmber den kua e ta enumerá e infrakshonnan i obligá di terminá nan i tene nan terminá bou di pena di 500.000 florin pa siman, ku un máksimo di 50 mion florin.
Ainda ta posibel hasi un apelashon na e último sentensia akí.
Medina ta bisa esaki komo kontesta riba e karta ku Egdar Leito a entregá na refineria durante e marcha di protesta di 7 di mei último. E dia ei 150 persona a protestá kontra polushon di Isla bou di guia di lider di e Komité Marcha Polushon, ku un tempu tabata hefe di medio ambiente na Isla.
Segun Medina mester di invershonnan grandi pa un periodo te despues di 2019, ora e kontrato di hür ku Refineria di Kòrsou (RdK) terminá. Invershonnan ku, segun Medina, ta amortisá nan mes te hopi tempu mas despues ku e fecha menshoná.
Prekupante
Den su karta e direktor general ta trese dilanti ku a pone su kompania dilanti di ‘ e situashon masha prekupante akí’. PdVSA ta enfatisá den e karta di Medina ku, no opstante, e ke tene su mes ‘estriktamente na norma i leinan di Kòrsou relashoná ku medio ambiente’.
Remarkabel den e karta di Medina ta e echo, ku Isla ta basa e demanda ku e ta tene su mes na lei di molèster, riba e argumentashon ku ‘esaki a sali na kla den e sentensianan diktá riba e tema akí, tantu na Korte di asuntunan atministrativo komo den Korte di kasonan penal di isla di Kòrsou’.
Medina ta bisa ku Refineria Isla a hiba e asuntunan akí na un bon final, ku e kompania ta dirigí su mes riba kumplimentu ku normanan di medio ambiente i ku e kompania ta demonstrá su ablidatnan tékniko riba e tereno ei.
Página di wèp
Medina ta kontinua bisando ku, n’e mésun manera ta resultá for di midimentunan di dióksido di suafel (SO2) ehekutá na stashon di kontrol di gobièrnu, ku e refineria ta kumpli ku e normanan stipulá. Por averiguá esaki tambe riba e página di wèp di Ministerio di Medio Ambiente.
Medina ta bai asta un paso mas leu, reprochando e Komité ku e ta ‘kometé un atentado riba trankilidat laboral i seguridat di nos prosesonan empresarial’. Na opinion di PdVSA e supuesto estafa di e Komité ‘den ningun aspekto no ta kontribuí na un diskushon sano, sinsero i habrí riba futuro di e refineria di Kòrsou’.
Bron: RNW
