RNW: ‘Spies dispuesto pa yuda Kòrsou ku enfoke di Isla’

Hulanda lo yuda Kòrsou ku sabiduria tékniko, kontakto i sosten organisatorio pa trata e problemanan di medio ambiente ku refineria Isla, si Kòrsou pidi esaki.

Asina e minister nobo di Asuntunan Interno i Relashonnan den Reino, Liesbeth Spies, a bisa promé ku el a bishitá e refineria na Willemstad. E wikènt aki Spies a bishitá refineria Isla i tambe a laga Fundashon Medio Ambiente Limpi na Kòrsou (SMOC) inform’é ekstensamente tokante problemanan di medio ambiente ku Isla. E minister a añadí ku gobièrnu Schotte no a hasi un petishon asina ainda. Na Aruba e minister a primintí sosten hulandes pa mantenshon di e refineria Valero, despues ku promé minister Eman sí a entregá un petishon pa esaki.

 Asuntu interno
Durante e kombersashonnan e mandatario nobo nobo a laga sa ku e fail di Isla ta un asuntu kurasoleño interno, ke men ku Hulanda lo aktuá solamente si pidi esaki. Hulanda su enbolbimentu segun Spies ta bon kla skibí den e parágrafo di Isla di e Inisiativa Sosial Ekonómiko (SEI). Hulanda lo tene Kòrsou na e akuerdonan aki. Konkretamente esaki ke men ku promé minister Schotte riba 31 di mei mester bini ku un vishon pa futuro di e refineria, sino Spies lo blòkia e plakanan di SEI. “Mester tin un plan di enfoke e ora ei, pa por terminá e diskushon largu tokante e refineria aki”, segun e minister.

No tin huma blanku
Peter van Leeuwen di SMOC ta mira minister Spies komo ‘e di sinku Papa hulandes kaba, sin ku huma blanku ta sali for di pipa di Isla”. E presidente di SMOC tin konfiansa sí den Spies su energia, pero ta konstatá ku ainda e minister no ta eksihí responsabilidat di Kòrsou pa loke ta ‘aki i awó’. “Den SEI a traha akuerdo tokante fortifikashon di servisio di medio ambiente i mantenshon di normanan di pèrmit. Pero Kòrsou no ta trata niun ora so ku elaborashon di esaki den práktika. Nos ta haña ku ta ei e prioridat mester ta”, segun Van Leeuwen.

“Gobièrnu di Kòrsou asta a apelá verediktonan di korte pa tene Isla na e normanan di pèrmit. Ku esaki Schotte ta violá akuerdo ku a hasi ku Hulanda. Si minister eksihí pa Kòrsou tuma su responsabilidat den esaki, e habitantenan ku ta biba den huma shushi pabou di Isla kisas mayan tin airu limpi”, Van Leeuwen ta bisa.

Korte oropeo
SMOC a trata di splika e minister ku e problema di Isla ló bira un asuntu di Hulanda, ora e movimentu di medio ambiente bai entregá un keho na Korte di Hustisia oropeo. “Si esaki sosodé”, asina Spies ta bisa den un reakshon, “Konseho di Minister di Reino ló tene Kòrsou responsabel.” Segun e abogado di SMOC, mr. Sandra in ‘t Veld, ku esaki Spies ta lubidá ku lo no keha Kòrsou sino Hulanda, a base di e emishon di CO2 di Isla i Derecho Humano. “Na final lo ta un kaso di ‘bon gobernashon’ i esaki ta reglá pa medio di un funshon di garantia den Statüt: un asuntu di Reino”, asina In ‘t Veld ta bisa.

Bron: RNW

Reacties zijn gesloten