At’é, el a yega: e relato di EcoRYS. Hende sabí lo pensa: pero a publiká e relato na 2005 kaba, tòg? Nò, esei ta un otro relato di EcoRYS, kaminda a mustra ku anualmente tin di lamentá un dies òf binti víktima fatal di e ekspulshon di Isla. Awor EcoRYS a saka un otro relato tokante Isla. Den e relato akí a pinta posibilidat pa futuro di Isla. Un sugerensia ta pa upgrade Isla. Esaki ta kosta hopi plaka i mester buska invershonista pa esaki. EcoRYS ta bisa ku fin di e aña akí (2013) mester ta kla si e invershonista t’ei i ku mester firma un MOU (Memorandum of Understanding) ku e hürdó aktual, PdVSA, pa kuminsá mas pronto ku ta posibel ku upgrade e refineria. Ya tin un invershonista ku hopi plaka? Pasobra un la di fèrf so sí no ta sufisiente nò. Segun SMOC esaki no ta e kaso. Anto PdVSA? Nan no sa invertí mashá den Isla. Negosiá ku Isla no ta fruktífero, pero mientrastantu e kontrato di hür ku PdVSA lo kaba na 2019 sí! Te e momentu ei enseñansa lokal tin ku prepará obrero pa upgrade Isla. SMOC no tin e impreshon ku Kòrsou ta riba e rumbo ei kaba. For di e relato nobo di EcoRYS por konkluí ku aktualmente kasi no tin hóben (di binti, trinta aña di edat) ta traha na Isla, sino mas tantu hende adulto (di sinkuenta aña bai ariba) ku pokopoko lo baha ku penshun. Pues eksperensia tambe lo baha for di e empresa. Rònt mundu pais ta bira mas severo pa loke ta trata eksigensia ambiental di kombustibel. Ta p’esei refinerianan mester inová. SMOC no tin konfiansa ku Isla ta hasiendo esaki, manera EcoRYS ta skirbi den su relato. Lesa e relato aki: EcoRYS2012Sustainable future for Curacao (Bron:Persbureau Qraçao).