WILLEMSTAD – Dia 31 di yanüari último e stashon di midimentu na Kas Chikitu a registrá un emishon sumamente haltu di ‘zwaveldioxide’ (SO2) den nos airu di kasi 1700 mikrogram pa meter kúbiko . Asina tin poné riba e website‘www.luchtmetingencuracao.org’, kaminda diariamente ta registrá e kantidat di polushon ku refineria Isla ta produsí.

SMOC (Stichting Schoon Mileu op Curaçao) tambe a publiká e resultado aki riba su website. Peter van Leeuwen di SMOC, a bisa Notisia360 ku ta trata aki di un sifra rèkòrt desde ku a kuminsá ku midimentu di esaki na 2010.

Segun gerente di medio ambiente i seguridat di refineria Isla, Henny Cornelia, e emishon haltu di ‘zwaveldioxide’ a keda okashoná dor di un kandela ku a surgi djabièrnè último n’e sitio kaminda refineria Isla ta depositá su desperdisionan.

“E kandela a kuminsá den un mondi entre Nijlweg i refineria i a pega un par di barí ku ‘zwavelijzer’ den dje na kandela”. Banda di e barínan ku ‘zwavelijzer’ tabatin tambe suafel den tera ku a kima i bai den airu. Esaki a okashoná u pik no usual den e emishon di ‘zwaveldioxide’.

Tin un total di kuater stashon ku ta midi emishon di ‘zwaveldioxide’  produsi dor di refineria , nan ta na Beth Chaim, Kas Chikitu, Marchena i Heintje Kool.

Bron: Notisia360