SMOC ta saka mensualmente un relato di e konsentrashon di dióksido di suafel (S02) na ambiente midí na altura di Beth Chaim ku Kas Chikitu. Siman pasá SMOC a ripití un biaha mas kon pisá e emishon di dióksido di suafel i stòf fini pa Isla tabata, asina grandi ku SMOC hasta a kere ku Isla a bati un rekòrt di SO2. Pero esaki no tabata bèrdat. Medio desèmber tabatin un emishon ainda mas pisá di SO2. Alménos, e promé midishonnan ta bisa ku na altura di Beth Chaim ku Kas Chikitu a surpasá e límite di WHO pa SO2 mas di mil biaha (averahe pa 10 minuto = 500 μg/m3; pa 24 ora = 20 μg/m3). Esaki ta kuadra ku e kehonan ku SMOC a risibí luna pasá di e siudadanonan ku ta biba òf traha pabou di Isla (konsultá e gráfika akibou).

No ta nada straño ku e resultado di un enkuesta di Ofisina Sentral di Estadístika (CBS) ta mustra ku mas ku ochenta proshento di e personanan enkuestá na Wishi ta eksperensiá molèster di holó stinki. Pero kuantu proshento di e polítikonan ta prekupá ku e habitantenan di Wishi? Ta ménos ku 50% sigur-sigur. Kisas e mayoria di nan ta preferá pensa den florin ku euro. Den e kaso ei SMOC ke mustra e mandatarionan riba un rapòrt ku Instituto di Salubridat Kòrsou (VIC) a publiká na 2013. For di e estudio akí a sali ku a gasta no ménos ku 13,8% di e Produkto Bruto Nashonal na gastu di kuido. Ta kompará Kòrsou ku 64 otro pais den e estudio akí. Kiko ta e konklushon? Kòrsou ta para number 2 riba e lista di paisnan ku ta gasta mas tantu plaka na kuido di salubridat. (mira nan sitio wèp). Esaki no ta nada di sorpresa, ya ku EcoRYS a duna di konosé na aña 2005 ku e emishon di refineria Isla ta kousa míles di hende pa hasi un apelashon na kuido di salubridat anualmente. SMOC, na nòmber di e habitantenan di Wishi, ta deseá i ta spera ku gobièrnu ta bai eksigí ku Isla tin ku mantené su mes na lei. Kua polítiko ta tribi di bringa e krímen di Isla?