Kontrali na loke Isla ta informá pueblo den su komunikado di prensa di dia 6 di ougùstùs 2015, sí tin rasonnan pa inkietut soshal, segun fundashon Clean Air Everywhere ku SMOC. Por ehèmpel e koló bèrdè ku algun kas a haña pa motibu di polushon kousá pa Isla, anto tambe tin daño konsiderabel na salubridat. Habitantenan ta keha tokante doló di kabes ku ta bira mas i mas fuerte, doló di garganta, benout i mas dolensha. Pa no papia mes di e kantidat spantoso di trato di bronkio serka beibi ku problema di rosea, ku ta oumentando dia pa dia.For di midimentunan diario ta sali na kla ku e emishon di materia tóksiko a bira kuater biaha (=4X) mas tantu durante e último tres añanan i ku e nivel ta surpasá tur sorto di límite aseptabel (mira e grafik).
Isla ta pretendé di kumpli ku e pèrmit ku el a haña, ku e ta emití ménos materia tóksiko na medio ambiente ku ta permití. Pero Isla sigur-sigur ta ko-responsabel pa e kehonan di salú ku e habitantenan ta eksperensiá. Gobièrnu mester mantené lei, pero (te ainda) e no ta hasi esaki. SMOC ku CAE a kuminsá un huisio sumario, pasobra gobièrnu (atrobe) ta nenga di hasi algu na defensa di pueblo toksiká pa huma di e refineria.
Isla ta referí na un relato di peritonan ku lo a mustra ku Isla ta kumpli ku e normanan ku ta konta pa emishon di materia tóksiko, pero SMOC i mas instansha a proba ku resultado den e relato ei no ta korekto, entre otro pasobra e resultadonan ta basá riba informashon prosediente di Isla mes. Otro eksperto ta laga sa ku e kalkulashonnan di e relato ku Isla ta referí na dje, no por kuadra ku realidat.
Fundashon Schoon Milieu op Curaçao (SMOC)
Fundashon Clean Air Everywhere (CAE)
