Kimamentu di kombustibel fòsil ta kondusí na emishon di CO₂ ku na su turno ta kousa ku laman ta subi tera i bira zür. Ku tempu esei ta kousa inundashon di áreanan di kosta i destrukshon di refnan di koral. Partikularmente islanan chikí ta kore rísiko di sufri enormemente di e konsekuensianan, siendo ku nan no tin forsa  ekonómiko pa remediá e problema, a ménos ku nan haña  yudansa di paisnan mas pudiente. (Esaki ta e problemátika “small island development states”)

Union Europeo a rekonosé e problema i a firma dia 26 yanüari 2015, huntu entre otro Aruba i Korsou “Caribbean Energy Security Summit Joint Statement“ . Gobiernu di Reino Hulandes a rekonosé durante e di 69 Reunion General di Nashonnan Uní ku kambio di klima hasta por pone nos eksistensia na peliger.

Tòg Gobiernu di Reino no a tradusí e palabranan geopolítiko i moral ku el a ekspresá dilanti di foronan internashonal den liderato konkreto di mesun índole geopolítiko i moral, partikularmente den direkshon di Korsou:  

• Sigun Departamentu di Energia di Merka Korsou ta den e tòp 5 di paisnan pa loke ta emishon di CO₂ pa kabes di poblashon, pa motibu di e refineria, di kua Gobiernu di Korsou ta propietario i PDVSA ta usuario.[1]
• A base di “Air Quality Index” (di entre otro e Agensia pa Protekshon di Medioambiente di Merka) por bisa ku biba den e huma di Isla ta peligroso. Orígen di e peliger ta aktonan kontra lei di parti di Isla. Korte di Hustisia Komun di Antia Hulandes i Aruba den apelashon a stipulá esei.[2] Derechonan humano ya ta bou di preshon enorme pa motibu di komportashon di sierto hendenan, kambio di klima lo hasi sirkunstansianan ainda mas difísil.
• Komportashon geopolítiko di parti di Gobiernu di Reino ta motibu di hopi interogatorio. Den di Sinku Rapòrt Nashonal di Reino Hulandes pa e Konvenshon riba Biodiversidat intenshonalmente no ta hasi ningun menshon di Isla, e konsekuensianan di sushamentu di aire, suela i awanan.

Rekomendashon:

• Ta importante pa tur pais ku ta partisipá na e próksimo kumbre tokante kambio di klima na Paris (COP21) ta na altura di e problemátika di “small island development states” ku ta eksistí den Reino Hulandes;
• Gobiernu Hulandes mester keda obligá pa asumí su responsabilidat a base di Statüt di Reino Hulandes;
• Tur isla di Reino Hulandes den Caribe mester por probechá ekstensivamente di e konosementu sientífiko i apliká riba tereno di durabilidat ku tin disponibel na Hulanda di tal manera ku e islanan por bira mas outosufisiente pa loke ta trata nan nesesidatnan energétiko.

[1] Aruba tambe ta riba e lista di tòp 10.

[2] http://www.stichtingsmoc.nl/2015/11/air-quality-index-leven-onder-de-rook-van-isla-is-hazardous/  i http://www.stichtingsmoc.nl/2010/01/eindvonnis-civiele-procedure/