Na 1920 Pigou a publiká The Economics of Welfare, su buki di pionero. Akiden e ta pleita pa balansa entre ganashi privá ku efekto sekundario negativo manera kontaminashon di medioambiente i e gastunan ku ta relashoná ku esaki di e pagadó di belasten pa kuido médiko nashonal. Hopi pais a saka inspirashon di Pigou i a bini ku pèrmit di medioambiente, prinsipalmente den añanan 60 d siglo pasá, pa protehé próhimo i naturalesa. Kòrsou a sigui na 1997. Basta ratu despues. Asina Isla (Shell) por a shusha kétubai riba lomba di hende ku aprobashon di Den Haag i straño ku por zona, di Isla (PdVSA, Venezuela) tambe, pasobra gobièrnu di Kòrsou nunka no a tene su mes na su leinan konserní. Sobradje e pèrmit di medioambiente riba su mes ta masha fofo ku normanan ambiental ku ta adekuá. Ya bo sa. Na 2007 Servisio pa Kuido Médiko i Salú Públiko (GGD) ta raportá ku habitantenan bou di huma a duna di konosé ku nan ke muda pa motibu di molèster di mal holó. Lástimamente, Nan no por paga esaki. Na 2011 Ofisina Sentral di Estadístika (CBS) ta raportá ku 83,1 % di e habitantenan di Wishi ta eksperenshá molester dje holó stinki. Ai, anto kos ta bira pió (mira e grafik akibou; inkluso un rekòrt nobo di kasi 1400 mikrogram pa meter kúbiko). Segun Air Quality Index biba bou di huma di Isla ta ‘hazardous’ i e konseho di salú ta pa no sali kas! Ta kon por? Na 2010 hues a dikta den apelashon ku Isla a aktua ilegalmente. PdVSA fásilmente por prosesá zeta ku ménos suafel aden, pero e ta ninga. Ganashi mester bai mas tantu posibel integralmente derechitu Venezuela (pasobra, manera ta konosí, Isla no tin ku paga impuesto riba ganashi). Gobièrnu di Kòrsou ta bai di akuerdo ku esaki i no ta haña nesesario pa tene su mes na lei si ta trata habitante di Wishi/Marchena. Komosifuera ta habitante di segunda kategoria. I, straño ku por zona, tambe hues ta haña ku gobièrnu kurasoleño ta riba skema. Kiko Pigou lo a pensa djesei?

Lesa aki e veredikto di 16 di novèmber 2015: Vonnis16november2015.