20 di febrüari 2016 – Esta bon pa sosiedat, ora tin reportero ku ta investigá di bèrdè. Di un manera òf otro nan sa deskubrí dokumento ku tabata tapá i skondí den baul. Manera awor akí, na fabor di SMOC. Ban bèk den tempu na (probablemente) fin di 1996. Señor Salsbach, e ora ei diputado di teritorio insular Kòrsou, a risibí un karta alarmante di minister Doran-Scoop di salubridat públiko i medioambiente, tokante konstrukshon di un sentral enorme di elektra riba tereno di Isla, esta BOO den boka di pueblo. Toma di desishon pa loke ta trata esaki, tabata un ‘mal’ ehèmpel di falta di transparensia, un patronchi ku SMOC ta rekonosé te dia djawe. Ya e idea so tabata duna Doran-Scoop doló di barika, pasobra: “Pero e direkshon ku abo a tuma, esta konstruí un sentral di elektra enorme, ku lo traha riba kos di tira afó di refineria, ku lo emití meimei di Punda un kantidat kresiendo di gas shushi, ta un desishon ku mi no por denotá na otro manera ku ‘niun tiki duradero’.”
Ta mas ku kla. Doran-Scoop na 1996 ya a mustra di ta hopi mas leu den su pensamentu ku mayoria di polítiko aktualmente na Kòrsou. Ma Doran-Scoop ta sigui. E invershon gigantesko den BOO el a konsiderá iresponsabel pasobra Isla “tabata un refineria masha antikuá i mal manehá” loke awendia Isla ainda ta, anto pió. Ademas Doran-Scoop tabata preokupá pa motibu di:
- konflikto di interes entre sektor di energia ku industria petrolero;
- kresementu defektuoso di turismo;
- un dependensia muchu grandi di Isla, tambe ora su rendementu na Kòrsou ta baha (e pronóstiko akí a sali ku e bahamentu kontinuo di empleo i e aporte na PNB!).Anto, mes importante ku esaki, el a opta pa eksigensia medioambiental pa fangu materia tóksiko pa salú di hende. Ta di lamentá ku Doran-Scoop mester a konstatá ku “su proposishon pa eksigensia minimal pa medio ambiente no a wòrdu inkorporá den e plannan aktual pa CUC/BOO.” Mientrastantu ta konosí ku Doran-Scoop a hala atras. Tambe Doran-Scoop a apelá pa mas energia di bientu ku solo i ménos energia di LNG.
Lesa e karta di Doran-Scoop aki: BriefDoranScoop.
