Esta tristu mi ta bira, tur atardi ku mi mira… Emishon di Isla/BOO ta asina sky high, ku no tin norma di kalidat di airu mas. Tuma por ehèmpel e normanan di WHO, relashoná ku dióksido di suafel (promedio di 10 minüt = 500 μg/m3; promedio di 24 ora = 20 μg/m3) riba nivel di bida. Ta mas ku kla ku kada pais ta liber pa dikta su mes norma. Na Kòrsou, hues ta pèrmití Isla pa kompartí 80 μg/m3 na nivel di bida, anto komo promedio di aña. Esaki ta mas haltu ku esun ku WHO ta rekomendá. Ta un sekretu públiko ku bou di huma di Isla/BOO sa midi balornan hopi mas haltu ku e 80 akí (mira akibou). Segun Air Quality Index di US Environmental Protection Agency di Merka, biba bou di huma di Isla/BOO ta ‘hazardous’, manera SMOC a duna di konosé diferente biaha kaba. Anto Kòrsou tin un densidat di poblashon di 339 habitante pa kilometer kuadrá (k.k.), kompará ku Merka kaminda tin 33 habitante pa k.k. Ta netamente pa e motibu ei nos ta deseá norma di medioambiente severo na Kòrsou, pa kumpli ku derecho humano básiko manera un medio di bida limpi. P’esei tin mester di un gobièrnu ku ta vigilá emishon di Isla/BOO, loke ta benefisiá ekonomia pasobra e ora ei por mantené gastu di kuido médiko relativamente abou.
Awor Kòrsou ta den top 3 di mundu pa loke ta trata emishon apsurdamente haltu di SO2 riba nivel di bida, kompará ku 210 siudat di mundu. Luna di aprel e mesun historia. Molèster di polushon sky high. Asina e midimentunan ta mustra. A surpasá norma di WHO pa dióksido di suafel mashá hopi biaha na altura di Beth Chaim i Kas Chikitu (promedio di 10 minüt = 500 μg/m3; promedio di 24 ora = 20 μg/m3). Tambe e konsentrashonnan di materia fini (PM10), midí na Kas Chikitu ta kousa prekupashon pa SMOC (mira akibou). Pasobra WHO ta sugerí pa PM10, komo promedio di aña, 20 μg/m3. Situashonnan asina ta pugna ku Deklarashon Universal di Derecho Humano (art. 25) i Tratado Internashonal di Derecho di Mucha (art. 24 ku 29). Mira e midimentunan akibou.
