Segun CBS (Ofisina Sentral pa Estadístika) no ménos ku 83,1 % di habitante di Wishi ta eksperensiá molèster di holó stinki (aña 2011). Tipo di eksperensia asina ta ilustrá kuantu molèster hende bibá bou di huma produsí riba tereno di Isla ta eksperensiá pa hopi aña kaba. Esaki ni opstante ku SMOC ta duna gobièrnu di Kòrsou i refineria Isla konseho medioambiental-ekonómiko grátis ya for di 2001, netamente pa baha polushon (mira e gráfika te abou). Sin resultado. Pió ainda, e situashon ta sali mas i mas for di man. Pa ilustrá e opinion akí:

• Despues di añanan di urgensha di parti di SMOC, gobièrnu di Kòrsou a primintí hues (fin di 2015) di kuminsá un investigashon grandi i elaborá di salubridat. E promesa akí a keda sin progreso te ainda, ni opstante palabra bunita di minister di defensa hulandes Hennis-Plasschaert den korant Trouw (22 di mart 2014)
• Akshon públiko pa rekoudá firma i denunsia na MP pa motibu di peliger di asbèst, organisá pa Fundashon Promové Derecho Humano Curaçao
• E kaso Andante ku prosesamentu di asfalt
• Dia 12 di aprel 2016 Vigilante a logra di saka potrèt di kimamentu na Isla

Fuente: Vigilante

P’esei dia 9 ku 10 di febrüari 2016 den Amigoe ku Antilliaans Dagblad SMOC a roga miembronan di parlamento pa presentá un moshon pa ‘mantené Isla instantemente na su promesanan di mameho’. Lamentablemente, niun di nan no a kumpli ku e petishon, pasobra niun representatnte di pueblo no ta tuma responsabilidat pa ku tereno di Isla.

Riba dia 16 di febrüari parlamento hulandes a tuma diferente moshon tokante di Isla, di kua esun mas importante tabata e konstatashon di malmaneho i violashon struktural di derecho humano (di habitantenan bou di huma). Den e moshon akí ta pleita ku denter di tres luna mester mengua maksimalmente e emishon. Ni esei no a tuma lugá, asina e promé midimentunan na altura di Beth Chaim a mustra pa e periodo yanüari/aprel 2016 (mira e gráfika akibou). E normanan di WHO pa dióksido di suafel (SO₂) a wòrdu surpasá tantu biaha (promedio di 10 minüt = 500 μg/m³; promedio di 24 ora = 20 μg/m³). Tambe tin hopi skor di mas ku 80 μg/m³ (mikrogram pa meter kúbiko), esta: e norma masha lali ku hues a pone pa Isla no surpasá (antó ta promedio pa aña). Mira spesialmente kuantu biaha ta surpasá 500 μg/m³ despues di 16 di febrüari!* No ta niun sorpresa ku den e lunanan pasá SMOC a risibí hopi keho di siudadanonan bou di huma. Situashon di bida manera esaki ta konfliktivo ku Deklarashon Universal di Derecho Humano (art.25), Tratado Europeo pa Derecho Humano (art 2, 8 ku 10) i Tratado Internashonal pa Derecho di Mucha (art 24 ku 29). Bahamentu di emishon kompará ku 16 di febrüari? Ni di kapotero! E violashon struktural di derecho humano ta sigui, ma tin ku para. Esei por sosodé ku rekonosementu polítiko ku garantia di derecho humano ta un asuntu di Reino. E rekonosementu akí SMOC ta spera djis akí, pasobra e tres lunanan di parlamento hulandes a pasa dia bieu, pero e emishon tóksiko pa medioambiente ainda no, ni e violashon di derecho humano.

* Mas informashon pa e amantenan

Kalke nivel pa dióksido di suafel (SO₂) ta wòrdu presentá na www.luchtmetingencuracao.org na mikrogram pa meter kúbiko (μg/m^{3 ò}f mcg/m³). Por rekalkulá esaki pa SO₂ na ppb si partié pa 2,66. P’esei e norma di WHO di 500 μg/m³ por wòrdu ekspresá na e siguiente manera:

Nivel di SO₂ = 500/2,66 = 188 ppb

Riba e wèpsait Air Quality Index (AQI) di US Environmental Protection Agency por yena e ora ei e produkto 188. Komo siudadano bo por haña un skor di AQI ku su konseho di salubridat. Ora bo yena riba e sait di AQI pa e materia konserní, den e kaso akí SO₂, e 188, e resultado di AQI ta 152. Esaki ta nifiká den palabra komun: insaludabel. Ta konsehá mucha, pashènt di asma, rosea kòrtiku i hende ku keho di pulmon o kurason, pa no sali kas, ni habri bentana. Anto -banda di SO₂ tambe ta emití un kantidat mas di otro materia ku ta molestia salubridat for di e tereno di Isla.