Fin di 2015 un mayoria di “Tweede Kamer” a tuma un moshon den kua Hulanda ta rekonosé ku Hulanda i Shell a kontribuí den pasado na daño serio na medio ambiente di Kòrsou i na e tereno di isla. E pasado ei ketu bai tin masha hopi influensia negativo riba Kòrsou. Pa tal motibu mayoria di “Tweede Kamer” a bolbe tuma un moshon na febrüari 2016 ku ta establesé ku e emishon i polushon prosedente di e tereno di Isla ta un ofensa serio kontra di derechinan humano di hendenan ku ta biba den besindario. E moshon a konkluí tambe ku e echo ku Gobièrnu di Kòrsou ta permití e polushon ta un akto di mal gobernashon.  A base di esei e moshon a stipulá ku mester redusí e polushon drástikamente den tres luna.

Pa SMOC esei tabata motibu pa públikamente puntra miembronan di nos mes Parlamento, Parlamento di Kòrsou, ki dia nan ta asumí nan responsabilidat pa representá hinter e pueblo di Kòrsou na un manera digno. Parlamento tin e tarea di kontrolá Gobièrnu i pèrkurá ku nan ta eksigí di Isla ku ta kumpli ku leinan eksistente di medioambiente. Lamentablemente Parlamento no a reakshoná. SMOC a bolbe pidi akshon konkreto di gobernantenan i parlamentarionan den un komunikado fechá 18 ougùstùs 2016 tokante e sustansia bèrdè ku ta baha ketu bai riba abitantenan den besindario di Isla. Den su komunikado di 1 sèptèmber 2016 SMOV a bolbe pidi atenshon, e biaha ei pa e echo ku ougùstùs 2016 tabata di remate atrobe ku Isla pa e enorme kantidat di dióksido di suafel ku Isla a manda den aire, ku konsekuensia hopi serio pa salú di hende.

Dia 7 sèptèmber 2016 miembro di “Tweede Kamer” señor Van Laar a bolbe hasi pregunta pa sa kon a para ku e redukshon di polushon ku ta asina nesesario. Lamentablemente ta parse ku no ta interesá Gobièrnu ni Parlamento di Kòrsou nèt nèt nada kiko ta pasa ku e hendenan di Wishi/Marchena i otro barionan den besindario. SMOC ke bolbe mustra riba investigashon di CBS (2011) for di kua a sali ku no ménos ku 83.1 porshento di hendenan di Wishi i Marchena tin molèster serio di e polushon.

Lesa mas aki: Besluitenlijst_procedurevergadering_commissie_Kr_7_september_2016.