Un djis akí tin elekshon. E ora ei bo ke ku tin debate di bèrdè, nò pa debate bira ko’i shap. Bo ke debate kaminda tin moral i solushon pa problema sosio-ekonómiko grandi. Pues polítika di bèrdat. SMOC ta haña ku te awe ta debate fofo nos ta haña, pasobra un dje problemanan mas grandi di Kòrsou, niun partido no ta mishi kuné: refineria Isla ku su efektonan perverso. Ta algu típiko dje moral polítika di e último desenionan, kaminda polítikonan di Kòrsou a bira kara wak otro direkshon pa no mira e kurason geográfiko di Kòrsou. Pero ya, ken sa ku djamars dia 27 awor den e debate nobo na Radio ParadiseFM kos t’ei kambia. SMOC ta niuskir pa haña sa, i ke refreská memoria dje polítikonan, sin pretendé di trata tur punto ku tin.
Si laman seka, bèrgwensa ta pa Dios: e habitantenan bou di huma ta kore peliger. Por ehèmpel: Na 2015 EcoRYS a raportá ku kada aña tin 18 hende ku ta muri prematuramente i ku tin míles di hende ku mester apelá na kuido médiko. Na 2011 CBS a raportá ku 83,1 % di hende bou di huma ta eksperensiá molester di holó stinki. Kousa: e emishon shushou saliendo di tereno di Isla, ku ta krese dia pa dia (mira e gráfika akibou). Ku e emishon akí ta sumamente altu, University of South-Florida resientemente a proba atrobe: Kòrsou ta den e tòp mundial di polushon di medioambiente. Un bèrgwensa grandi pa e bunita isla (pa turista) akí. Kon ta posibel? Wèl, Isla ta menospresiá Wan Fulan ku ta biba bou di huma i Isla no ta tuma su responsabilidat pa produsí na un manera mas limpi. Gobièrnu di Kòrsou, ku na prinsipio mester protehé su siudadanonan, ta laga esaki pasa desenionan largu kaba, mirando e echo ku nunka no a mantené Isla na su debernan. Simplemente no tin niun servisio ambiental ku tin e outoridat outónomo, independiente di politikeria, pa mantené regla. Ku otro palabra, manera na 2011 PWC a raportá den “Oog voor Duurzaamheid” pa loke ta trata servisio ambiental:
“No tin sufisiente kapasidat (kuantitativo/kualitativo) denter di e servisio pa kontrolá e eksigensianan di e pèrmitnan. Ordenansa di molèster pa industria grandi no ta basta konkreto. Tin mester di revishon.”
Resultado neto: ta violá derecho humano (por ehèmpel Deklarashon Universal di Derecho Humano, art. 25) gravemente bou di huma di Isla i tin malmaneho. SMOC ta puntra si e futuro polítikonan ta di akuerdo ku esaki, anto prinsipalmente ta kua solushon nan lo trese den e debate riba término korto, entrante mesora, pues. Nan ke pa mantené regla? Mester obligá al instante kombustibel mas limpi pa baha e problema di polushon drástikamente i duna salubridat un ‘boost’ positivo? Ki dia porfin ta kuminsá ku midimentu èkstra di medioambiente, manera nan a primintí dia bieu kaba? I kisas e pregunta di mas importante: Ta di bèrdat ku ta harma un servisio ambiental ku ta kapas di mantené Isla na regla? SMOC ta ansioso pa sa e kontestanan i ta keda spera riba interes di bèrdè dje polítikonan pa (salubridat di) e míles di habitantenan bou di huma di Isla.
Drs. Arjan Linthorst (miembro di direktiva di SMOC)
