Na lugá di Isla eliminá e polushon ku e ta kousa, Isla ta preokupa ku e imahen negativo di Korsou den eksterior. Sigun Isla e imahen negativo ta hasi daño na nos turismo i na nos ekonomia. Ku publikashonnan den korantnan Extra, Ultimo Notisia i Amigoe Isla ta hasi un intento envano pa trese duda rondó di un investigashon serio ku Dr. Erin Pulster a hasi. A base di e investigashon señora Pulster logra título di  doktor na Universidat di South Florida. E investigashon ta konstatá atrobe ku a midi masha hopi dióksido di suafel i sustansianan ku ta duna kanser. E resultadonan di e investigashon sientífiko ku Dr. Pulster a hasi ta devastador pa esnan ku ta responsabel pa e polushon, ku ta Gobiernu i refeneria. Gobiernu pa e hecho ku e no ta obligá Isla kumpli ku lèi.

Mas aleu Isla ta bisa ku SMOC ta asina deseperá ku SMOC no ta verifika e konklushonnan di dr. Pulster ku sigun Isla ta inkorekto. Isla ta puntra si  SMOC  a aseptá ponensianan di Dr. Pulster djis pasobra e konklushonnan ta negativo pa Isla.

Wèl e pregunta ei ta masha fasil pa kontesta. Na promé lugá, SMOC no ta desesperá. Esnan ku ta desesperá ta e hendenan ku tin ku biba den huma di Isla dia aden dia afo, a kosto di nan salú i nan bida. Sigun enkuesta di CBS na 2011 no mas ku 83,1 % di hendenan ku ta biba den Wishi/Marchena a keha di molèster di  holó malu.  Skolnan manera Juan Pablo Duarte VSBO pa di tantu bia mester a sera i manda mucha kas pa motibu di molèster di huma di Isla. SMOC ta sali dilanti pa defende derecho di e hendenan ei, i no ta kansa, tanten ku e inhustisia ta dura, muchu menos desesperá.

Na di dos luga, kualkier sugerensha ku SMOC tin de haber ku un investigashon ku a keda hiba konforme reglanan i standartnan sientífiko ta for di lugá, i un ofensa pa e investigador. Dokter Pulster ta yama danki pa sosten ku e a risibi, esta  Gerard van Buurt, George Keiffer (Curaçao Seaquarium), Tone Moller (Avila Hotel) i habitantenan di Korsou ku a duna splikashon di e situashon lokal i a duna sosten logistiko. E ta yama danki na Mote Marine Laboratory, na Skol di Salú Públiko di Universidat di South Florida pa e “US Public Health Traineeship” ku e Universidat a brinda i  Milieufonds Nederlandse Antillen. No na SMOC!

Na di tres lugá, SMOC ta kompartí informashon (sientífiko) ku e topa. Asina dr. Pulster i ko- outornan publiká nan investigashon tokante e sushamentu di mediombiente dor di Isla den revistanan sientífiko internashonal, SMOC lo komparti’e meskos ku SMOC a hasi ku hopi otro artíkulo ku a yega di sali den revistanan.

Pues ta bon pa Isla tuma bon nota ku e sosten pa e estudio a bini entre otro di parti di sector turístiko mes, i no di SMOC. Mientras Isla ta akusá otronan Isla mes  ta sigui kousa polushon is asina ei hasi daño na medioambiente, salú di hende i na industria turístiko. Isla, baha for di SMOC su lomba i bai para e polushon ku abo ta kousa!