Rapòrt di CBS: Emishon CO2 pa habitante na Kòrsou ta ekstremamente haltu

No ta pa promé biaha ku SMOC a bati bèl tokante emishon di Isla. Tur kurasoleño ta na altura di esaki entretantu. Mayoria di biaha esaki ta trata materia ku ta molestiá salubridat i medioambiente, manera dióksido di suafel òf PAKnan ku ta kousa kanser. Sinembargo, ántes, SMOC tambe a mustra riba emishon di gas dañino pa medioambiente, manera dióksido di karbon (CO2). Pasobra emishon di CO2 pa habitante na Kòrsou ta apsurdamente haltu, manera US Department of Energy ya a duna di konosé den pasado. E hecho akí ta hasi ku Kòrsou ta para den top 10 mundial di paisnan ku mas tantu materia molestioso, meskos ku e nivel di emishon di dióksido di suafel. Ta un honor dudoso.

Esaki ta kontradesí tratado internashonal manera Convention on Biological Diversity i e akuerdo di klima di Paris. Dikon? Pasobra e organisashon di prestigio Intergovernmental Panel on Climate Change ta suponé ku emishon di CO2 ta kana man na man ku keintamentu global i subida di nivel di laman – ku tin konsekuensha na promé lugá pa isla chikitu. Edemas, emishon di CO2 tambe ta kondusí na asidashon di oséano, i ref di koral no por resistí esaki adekuadamente.

CBS ta mustra kurashi ku su idea pa bai midi strukturalmente emishon di CO2, pa tur habitante di Kòrsou. E siman akí a saka e rapòrt Curaçao Carbon Footprint 2015 (mira akibou). Resultado: 26,4 tòn per capita, ku ta masha haltu mes internashonalmente mirá. Kousante prinsipal segun CBS: Isla.

Lesa e rapòrt akí: Curaçao Carbon Footprint 2015.

Pa kompará ku otro pais, wak esaki.

Reacties zijn gesloten