Aki poko dia tin elekshon. Vários tópiko ta importante, ma refineria Isla sigur ta un di nan. Tin hende ta bisa ku e tereno di ISLA ta kurason di Kòrsou. Ta bèrdat. Ekonómikamente por ehèmpel, pero e kurason no ta bati meskos ku laga nos bisa sesenta aña pasá. Pa ilustrá esaki: empleo a baha, segun Refineria di Kòrsou, di 12.631 obrero na 1952, ku un sierto kantidat di poblashon, na masoménos mil trahadó awor, ku un poblashon hopi mas grandi ku na 1952. Tambe tin un gran parti di e habitantenan di Kòrsou ku ta haña ku e kurason ta sufri di sierto fayo di kurason. Pa ilustrá: CBS a raportá na 2011 ku 83,1% di e poblashon di Wishi/Marchena ta eksperensiá molester di holó stinki biniendo dje tereno di Isla i segun EcoRYS tin desenas di morto prematuro anualmente. No ta nada straño. Nunka gobièrnu di Kòrsou no a mantené lei pa ku refineria Isla, ku e konsekuensha ku ta surpasá e normanan pa medioambiente di Kòrsou, ku riba su mes ya ta hopi mas haltu kompará ku na otro pais. Kiko: kalidat di airu pabou di Isla ta pertenesé na esnan di mas malu mundialmente mirá, manera University of South Florida a mustra den su investigashon. SMOC a siñalá esaki vários biaha kaba. Tambe luna pasá a traspasá fuertemente e normanan di Organisashon Mundial di Salubridat (WHO), mirando e promé midishonnan (mira e grafik akibou pa emishon di dióksido di suafel (SO2)).
Ta opvio: tin desbalansa entre konsiderashon ekonómiko i rèspèt pa derechi humano fundamental (pa hende pabou di huma). Loke ta positivo ta ku aparentemente algun partido ta kuminsá ripará esaki tambe. Pa ilustrá: PAR ta purfiá den su programa ku mester mantené lei aktual i medida (manera límite di emishon) pa en kaso ku bini un operadó nobo di e refineria, Un Kòrsou Hustu ta aspirá e prinsipio di durabilidat ‘People, Planet, Profit’ riba su website i MAN ta primintí di komprometé su mes na e akuerdo di klima di Paris. Aparentemente e punto di bista di SMOC ta resoná mas i mas den programa di partido. E opinionnan di SMOC no ta nada difísil tampoko. Ku e pèrmit di medioambiente aktual gobièrnu di Kòrsou por eksigí Isla pa pasa mesora pa kombustibel mas limpi ku esun di awor. E emishon shushi ta baha e momentu ei mes, i alabes e molèster pa e habitantenan tambe ta bira ménos. E ora ei Isla por keda funshoná – pasobra, basá riba e Agreement between the Netherlands Antilles, the Island Territory of Curaçao and Petroleos de Venezuela S.A., Isla ta dispensá di paga entre otro belasten di ganashi i impuesto di importashon. Ekonomia, medioambiente i rèspèt pa derecho humano e ora ei ta bini den un balansa. Loke ta keda pa anhelá awor ta energia polítiko, ku por remplasá frase bashí di polítikonan, ku habitante di Wishi/Marchena ya por eksperensiá mayan ku Dios ke. Esaki ta konta pa término largu tambe. Na 2012 EcoRYS riba petishon di gobièrnu di Kòrsou a reportá ku na fin di aña 2013 mester ta mas ku kla ken ta bai bira e invershonista nobo di Isla, si lo kontinuá refinashon di zeta na Kòrsou. Den e aña aktual nos tin ku konstatá ku esaki no ta shen porshento kla ainda, a pesar di tur palabra i promesa bunita di polítikonan. Ta p’esei e tempu a yega, awor sí, pa polítika ku lèter kapital, kaminda ta pone interes di e sosiedat di Kòrsou, di bèrdat, na promé lugá, pa remplasá e mal maneho di e último dékadanan pa loke ta trata refineria Isla.
Drs. Arjan Linthorst (miembro di direktiva di SMOC)
