Kalidat di airu: duna bèrdat stul pa sinta

Ta masha fásil pa laga málkomprondementu kana rònt den mundu. Esaki a sosodé siman pasá, ora Antilliaans Dagblad a publiká un artíkulo ku e kabes engañoso “Kalidat di airu ta kumpli ku norma”. Nos di SMOC ta mustra ku e midimentunan, referí na dje den e artíkulo konserní, no a tuma lugá rondó di refineria, sino ta konta pa un midimentu so tumá na Julianadorp serka di Vespuccicollege, un lokashon ku ta keda nèt pafó di e límite di e área bou di huma, anto a midi un periodo sumamente kòrtiku so na 2016. Antilliaans Dagblad ta referí na un relato di GGD Amsterdam, titulá “Meetresultaten Julianadorp Curaçao”. Ta mas ku kla ku SMOC ta apresiá e publikashon akí i SMOC tambe ta kontentu ku airu a kumpli ku norma na e lugá ei den e periodo ei. E relato akí ta di komienso di 2017 i aparentemente e ta públiko, meskos ku un relato ku ta hopi mas importante, di e mes periodo, di e mes GGD Amsterdam, titulá “Meetresultaten Luchtkwaliteit Curaçao 2016”. E relato akí tin resultado i un konklushon distinto. Na página 12 e konklushon no por ta mas kla: 

,,Tradusí e ta bisa ku e konsentrashon SO2 midí na stashon di midimentu Beth Chaim ta surpasá e eksigensianan for di Anekso F, tantu pa kantidat di promedio di dia mas haltu ku 365 µg/m3 (a sosodé 3 biaha, un biaha ku pèrmit) komo pa promedio di aña (a midi 153 µg/m3 miéntras ku 80 µg/m3 ta permití), e konsentrashon a baha ku 30% sí kompará ku 2015. E konsentrashon di SO2 na 2016, midí na stashon Kas Chikitu, tambe a baha ku 30% kompará ku 2015 i esaki sí ta kumpli ku e eksigensia di promedio di dia, pero e ta mas haltu ke e eksigensia di promedio di aña (a midi 85 µg/m3 miéntras ku 80 µg/m3 ta permití).”

Te aki e konklushon. Duna bèrdat stul pa papia. Pabou di e tereno di Isla, pegá na dje, kaminda hopi hende ta biba den un área relativamente chikí, na 2016, ‘nan’ a bolbe surpasá e normanan di medioambiente pa dióksido di suafel (SO2) – ku pa Kòrsou ya ta hopi fofo, pasobra WHO ta sugerí komo norma: 20 µg/m3 – anto pa kolmo produkshon di Isla tabata ménos ku na 2015. Konklushon final: kalidat di airu ta leu for di kumpli ku norma.

 

Reacties zijn gesloten