PELIGER PA SALÚ BOU DI HUMA

31 YÜLI 2011 – Nos a menshoná riba nos página di wèp diferente biaha kaba kiko ta e normanan di WHO (World Helath Organization). E ora ei nos a sali for di e norma ku ta relashoná ku un periodo di tempu di 10 minüt. Sinembargo WHO konosé otro norma tambe, relashoná ku un promedio di 24 ora. WHO ta bisa ku un persona (medial), midí pa un periodo di 24 ora, no tin mag di wòrdu eksponé na un nivel di dióksido di suafel ku ta mas haltu ku 20 µg/m3 (medial) (pronunsiá komo 20 mikrogram pa meter kúbiko). Den e gráfika akibou por mira kon e situashon tabata durante último luna na Kòrsou, bou di huma di refineria Isla (na altura di Beth Chaim). Luna pasá Isla a surpasá e promedio di 24 ora di WHO pa dióksido di suafel, bo por bisa, strukturalmente. Kiko ta e efekto pa salubridat? Mira aki pa haña un impreshon. SMOC ta remarká ku den e kaso akí solamente ta trata di dióksido di suafel. Loke no ta konosí ta dato di otro supstansha, pasobra no ta midi eseinan. Ma WHO ta afirmá ku emishon di dióksido di suafel hopi biaha ta bai kompañá di emishon di ‘co-pollutants’. Pa terminá: SMOC tin duele di tur hende, inkluso empleado di Isla, ku ta sufri di problema di rosea, asma òf pulmon.

Reacties zijn gesloten