Gobièrnu di Kòrsou mester obligá por eskrito dentro di kuater siman pa terminá e violashon di lei di e normanan di medio ambiente den e pèrmit di molèster i perkurá pa kumpli ku e eksigensianan. Esei ta loke wes a dikta djaweps 1° di sèptèmber.
Ku no kumplimentu ku sentensia di wes tin un multa ku por akumulá te 50 mion florin. Ku e sentensia akí pa tempu benidero tin un fin na un konflikto ku durashon largu entre organisashonnan di medioambiente SMOC i gobièrnu di Kòrsou ku a kuminsá na 2005.
SMOC a eksigí den e kaso den korte ku e normanan ku gobièrnu a stipulá den e pèrmit di molèster ta keda mantené. Punto di bista di gobièrnu tabata ku Isla no ta violando e pèrmit di molèster i ku e mantenementu na e pèrmit di molèster no ta al kaso. Wes awor ta hala un strepi diki dor di esei. No por saka na nada ku gobièrnu por supstansiá su punto di bista, segun wes di gobernashon Boerlage.
Negligente
For di e sentensia di 34 página ta resultá ku refineria a violá sistemátikamente e último seis añanan e normanan di molèster i ku gobièrnu tur e añanan ei tabata negligente den mantenementu di e pèrmit di molèster. Asina wes ta stipulá ku gobièrnu pa tres bes a keda sin evaluá e pèrmit pa ehekutá e mehoramentunan pa medioambiente.
Tambe gobièrnu a laga di entamá un struktura di deliberashon entre Isla i e Servisio di Medio Ambiente. Dor di esei – i dor di falta di mantenementu – gobièrnu a hasi e asuntu imposibel pa Servisio di Medioambiente pa hasi su trabou.
Mas aleu wes a dikta ku Isla tabata muchu lat pa avisá tokante e insidente di puiru di 2 di yüni den Julianadorp i ku gobièrnu no a hasi nada ku esei. Ademas despues di e insidente di puiru no tabatin midimentu tampoko, miéntras ku mester hasi esei segun e pèrmit. “Gobièrnu tambe mester ta kontrolá esei, pero el a faya den esei”, segun e wes.
Viktoria Moral
“Pa nos e sentensia ta un viktoria moral i polítiko”, asina presidente di SMOC Peter van Leeuwen ta bisa. “Awor tur kos ta pretu riba blanku tur e kosnan ku ta robes na Isla i gobièrnu no por drei mas rondó di dje.”
“Ademas si un hende mester sinti ku e asuntu akí ta bai kontra dje anto esei ta Piet Hein Donner, pasobra e ta esun ku a deklará ku gobièrnu di Kòrsou ta trahando den bon direkshon pa loke ta trata Isla.”
Multa Mionario
Dentro di kuater luna gobièrnu mester publiká tantu den un korant na papiamentu i na hulandes e karta ku e obligashonnan pa mantené e normanan di medioambiente. Ademas wes a dikta ku si gobièrnu no aktua pa mantené e normanan hustisia lo ta ménos restringente i gobièrnu mes lo por aktua.’ “Esei ta un viktoria históriko pa SMOC i un ofensa pa gobièrnu”, segun van Leeuwen.
E minister responsabel Jacintha Constancia di Salubridat i Medioambiente no tabata alkansabel pa komentario. Gobièrnu tin seis siman pa bai korte superior kontra e sentensia akí.
Bron: RNW
