WILLEMSTAD – Refineria Isla no por fakkel pa loko mas. Por fakkel den futuro solamente bou di kondishonnan estrikto, por ehèmpel ora tin e nesesidat industrial pa hasi esei. Esei por ta ora para e instalashonnan of ora ta bai start-up. Ademas den futuro mester informá Servisio Ambiental mesora ora ta bai fakkel. Asina Gobièrnu di Kòrsou lo manda bisa Refineria Isla den e próksimo oranan a rais di e veredikto ku korte a duna dia 1 di sèptèmber último den e kaso di SMOC a gana kontra Gobièrnu di Kòrsou relashoná ku e molèster di e refineria.

No tabata masha kla awe si Gobièrnu lo tuma e rekomendashon di diferente banda pa no fakkel mas durante di oranan di anochi. Aparentemente esei no ta posibel, pasobra ora fakkel esei ta kubri mas ku 12 ora. Ku otro palabra no ta posibel pa stòp fakkelmentu pa despues warda dia habrí pa bolbe kuminsá fakkel.

Di tur manera den e kaso di korte di kuminsamentu di luna, wes a bari tur e argumentunan di gobièrnu i Refineria Isla for di mesa. Ta di tantísimo biaha ku e kaso di emishon di polushon ta bin riba mesa i wes a konsiderá ku awor si ta basta. Es mas, wes den un veredikto amplio tambe a huzga ku ta masha kaso tabatin i ningun di nan a yuda te awor. A base di esei, el a yega na un veredikto pa duna Gobièrnu di Kòrsou 4 siman pa bin ku e lei di molèster pa Refineria Isla, pa hasi e reglanan mas skerpi i pa atendé  e

normanan di polushon manera a palabra den pasado dia ku PDVSA a tuma operashon di e Refineria. Pa kada siman ku Gobièrnu no kumpli wes a pone un multa di mei mion florin te na un máksimo di 50 mion florin. E mula ku a imponé so kaba ta un indikashon konkreto ku wes tambe a fada di e kasonan konstante ku tin den korte.

Awor a keda na Gobièrnu pa instruí Refineria Isla pa tene kuenta ku e reglanan. E karta lo sali den e próksimo oranan pa kumpli ku e término ku wes a pone komo periodo pa atendé e kaso. E karta lo mester yega serka gerensia pa mas tardá dia promé di òktober ku ta djasabra awor.

Bron: La Prensa (29 september 2011)