RNW: ‘SMOC: Rutte ta usa indikashon ora ta kumbiní’

Organisashon di medio ambiente, Fundashon Medio Ambiente Limpi (SMOC) ta haña remarkabel ku promé minister di Hulanda Mark Rutte ta traha duru pa duna Kòrsou un indikashon tokante su finansanan, pero no pa mantenshon di refineria Isla.

Despues di un bishita di trabou ku e lidernan di frakshon di parlamento hulandes na 2007 a hasi na Kòrsou Rutte, ku e tempu ei komo presidente di frakshon di VVD tabata den opsishon, a bisa gobièrnu hulandes di e tempu ei ku si ta nesesario mester intervení ku un indikashon gubernamental si Kòrsou no aktua mas severo kontra e infrakshonnan di e refineria venesolano PdVSA. Ma e indikashon ei no a bini nunka, ni awor ku e ta promé minister.

Gobièrnu defektuoso “Rutte tabata haña e manera di pensa di e gobièrnu anterior di Kòrsou un ehèmpel di e manera defektuoso ku gobiernu insular tabata defendé bienestar di e habitantenan. Anto awor e mes ta komportá meskos”, ta opinion di Arjan Linthorst di direktiva di SMOC. “Rutte no tin kurashi pa trata e tópiko. Kaminda ta berdaderamente un asuntu di Reino, ke men su responsabilidat.”

Tarea di Reino Linthorst ta basa su mes riba Statüt di Reino ku ta bisa ku garantia di derecho humano i perkura pa tin gobernashon drechi, ta tarea di Reino. “Gobièrnu di Kòrsou desenanan largu no ta mantené esaki i tur aña kasi binti hende ta muri komo konsekuensha di huma di Isla. Ke men ta violá derecho humano i ta trata apsolutamente di gobièrnu defektuoso”, Linthorst ta splika. “Isla tambe mester tabata un punto riba agenda.”

Mas kurashi den futuro SMOC ta spera ku den futuro Rutte lo okupá su mes ku Isla. “Nos ta apresia e puntonan di bista di Rutte na 2007 pero nos ta spera ku den futuro e tin mas kurashi pa hasi algu ku nan”, Linthorst ta bisa. “Naturalmente ta bon ku e ta intervení den área finansiero pero ta di spera ku pronto lo e kòrda salubridat di e siudadanonan di Kòrsou.”

Bron: RNW

Reacties zijn gesloten