WILLEMSTAD – E organisashon di medio ambiente SMOC a hiba e kaso di polushon di Refineria Isla na e Korte Oropeo di Derechi Humano. Presidente di SMOC Peter van Leeuwen a bisa ku nan a keda sin alternativa. Meta di e petishon ta pa pone Estado Ulandes responsabel pa mantené normanan di medio ambiente manera ta stipulá pa e Organisashon di Mundial di Salú  (WHO). SMOC ta haña ku Estado Ulandes ta responsabel pa loke ta pasa na Kòrsou, un parti di reino ulandes. No opstante normanan establesé, tur dia ta violando e normanan aki. Ta solamente ora pusha por bin kambio ku por resultá den un but òf kompensashon haltu. Kisas hasta por yega na un medida pa sera òf renobá e refineria, asina SMOC ta bisa.

Van Leeuwen a bisa ku despues di 7 aña ku SMOC a prosedé den korte, e organisashon a pèrdè tur konfiansa ku gobièrnu lo tuma akshon kontra e polushon konstante i grave ku Refineria Isla ta okashonando. “E falta di boluntat pa aktua no ta bin solamente di gobièrnu pero tambe di hustisia (korte). E muraya aki di falta di boluntat ta strañá e organisashon i a lo largu ta masha frustrante. Konstante violashon di derechi humano di e forma aki por sigui sin sanshon. Gobièrnu ulandes ta ninga di asumí su responsabilidat i ta permití ku e violashonnan di derechi humano aki ta sigui sin konsekuensha. Gobièrnu ulandes ta ninga di karga su responsabilidat i ta permití e violashonnan aki den reino. No a keda otro alternativa sino di pone e asuntu aki na atenshon di Korte Oropeo”, asina Van Leeuwen a bisa.

Bron: Notisia, 11 maart 2013