Willemstad, 7 di yanüari 2014

Tokante: problemanan ku refineria Isla; tempu pa akshon

Apresiado Miembronan di Parlamento di e Komishon Relashonnan den reino,

Bonbiní na Kòrsou. Ta un plaser risibí boso (atrobe) na nos pais kaminda boso será konosí ku e isla dinámiko akí, ku boso wowo i nanishi.

E dinamismo di e isla akí ta prinsipalmente ubiká den e kurason geográfiko di Kòrsou: refineria Isla. Den avion bo por a mira kaba e refineria di 500 hèktar, di koló pretu ku asento hel di suafel i si bo a bishitá e barionan Wishi, Marchena i Julianadorp kaba bo por a hol’é tambe. Isla, e problema mas grandi di Kòrsou, ya ta diskutí den parlamento Hulandes diferente biaha, meskos ku e investigashon di Unicef tokante derecho di mucha na Kòrsou. No por mira nan lòs for di otro i p’esei tur dos, esta e problemanan di Isla i e investigashon di Unicef ta pará riba agènda di boso bishitá na Kòrsou. P’esei SMOC ta pidi boso atenshon pa lo siguiente.

E relato di Unicef ta bisa ‘pa hasi mas investigashon na e kousanan di problema di salú bou di mucha i hóben. Esaki ta enserá investigashon na e impakto di polushon di medio ambiente.’ Esaki ta kuadra ku Art 24, miembro 2, sup c di e Tratado Internashonal Tokante Derecho di Mucha. Tur mucha, meskos ku tur adulto, tin derecho riba aire limpi, pero bou di huma di Isla esaki no ta eksistí. Niun hende no ta desmentí e hecho ku no tin aire limpi. Al kontrali, tur hende sa ku debidamente ta kousa polushon di aire serio. Esaki ta archivá den hopi rapòrt i den vários deklarashon hurídiko. Na 2010 hues a konstatá akto ilísito di Isla. Un veredikto ku ketu bai ta aktual mirando e echo ku ta surpasá regularmente normanan di World Health Organization na un manera brutu, mester sera skol kada momento debí na molèster pa salubridat, etcetera. E problemanan di medio ambiente i salubridat públiko, inkluyendo kaso di morto i míles di persona ku tin ku apelá riba kuido médiko èkstra, ya ta konosí serka boso (relato di EcoRYS, 2005). No ta algu parotin, e atenshon di Parlamento hulandes pa Isla.

Nèt promé ku zomer Senado hulandes a aprobá e moshon Quik (SP) ku ta boga pa kooperashon entre Kòrsou i Hulanda pa loke ta trata Isla. SMOC ta apresiá e moshon akí, pasobra Isla ta masha grandi, si no ta muchu, pa un pais chikí manera Kòrsou. Banda di esei Hulanda tin un deber di honor ora ta trata Isla, ya ku esaki ta un herensia di Shell real. Pero laga nos ta honesto, kiko de fakto ta resultado di e moshon? Te ainda nada.

Riba dia 28 di novèmber minister Plasterk a kontestá preguntanan den Parlamento di parlamentario Hachi (D66) i Segers (CU). Lástimamente el a duna kontesta robes, bon mirá. Plasterk ta bisa ku e stashonnan pa midi na altura di Beth Chaim i Kas Chikitu tei ku plaka di SEI. En realidat e stashonnan pa midi a wòrdu realisá – ku tur nan límitenan kímiko di medio ambiente – despues ku SMOC a eksigí esaki den proseduranan hurídiko. Plasterk tambe ta skirbi ku kompará ku 2008 Servisio Ambiental ta reforsá ku plaka di SEI. Pa SMOC no ta kla unda Plasterk por a konstatá e fortifikashon. De fakto na Kòrsou no tin un Servisio Ambiental. Durante su bishita resien na Kòrsou SMOC a mustr’é riba e echo akí. Atrobe sin resultado: minister ta malinformá Parlamento i Senado hulandes. Esaki ta perhudisial.

Ya ku aktualmente no tin un Servisio Ambiental ku ta funshoná, no ta nada straño ku no tin mantenshon. Nunka gobièrnu di Kòrsou no a parti but ni a tuma otro tipo di akshon. Minister Whiteman di medio ambiente, naturalesa i salubridat públiko, tin e mes opinion ku SMOC, esta ku no por mas. Asina el a duna di konosé den e reportahe di Zembla (VARA, 21 di mart 2013). Den e programa ei Whiteman tambe ta pidi Hulanda pa yuda solushoná e problema di Isla. E ponensia di Whiteman ta lógiko ora ta konsiderá e echonan relevante. Mientrastantu siman pasá Whiteman sí ta kooperá ku Isla limpiando playa Kenepa. Nada di good governance.

Ta realístiko pa papia di impotensia pa manehá i di violá derecho humano. Esaki ta idéntiko na preguntanan di Parlamento na 2008 di Rutte (VVD) i Van Raak (SP) ku su hendenan kaminda ta pone ku ta violá artíkulo 2 ku 8 (EVRM).

Ora yega ora SMOC ta konvensí ku tur partido di Parlamento ku Senado ta haña ku ta violá derecho humano i ku tin mal maneho. Den tal kaso regla di wega ta mashá kla pa kualkier munisipio, provinsia òf pais den Reino Hulandes: Konseho di Minister di Reino ta obligá di aktua konforme artíkulo 43, e di dos miembro, di Statüt di Reino Hulandes.

Despues di añanan di retórika i tantu rapòrt tokante e materia akí awor tempu pa akshon a yega. Prinsipalmente aworakí pasobra tambe mayoria di Parlamento di Kòrsou ta rekonosé ku Isla ta forma un peliger pa hende i medio ambiente. P’esei SMOC ta proponé ku Parlamento i Senado di Hulanda huntu ku Parlamento di Kòrsou ta yuda otro konstruktivamente di tal manera ku Isla no ta keda un ko’i hunga polítiko mas ku hende bou di huma – inkluyendo e trahadónan den servisio di e refineria – di Isla mester paga e preis mas haltu. Anto ta trata tantu e situashon aktual komo esun den futuro.

Un paso konkreto por ta laga ehekutá un inspekshon kompleto di e tereno di Isla pa Konseho di Salubridat. Tambe por laga eksperto di Hulanda tuma asiento den e komishon resien formá pa studia e senario pro ‘Upgrading’ na un banda i den e komishon pa e senario di emergensia ‘Klousura’ na e otro banda. E formashon di e komishonnan ta kontroversial i niun tiki transparente.

Pa finalisá, nos ta pidi boso urgentemente pa hasi tur loke ta posibel durante boso bishita pa realisá loke tin skirbí den e karta akí.

Atentamente,

Drs. Arjan Linthorst, miembro di direktiva              Drs. Peter van Leeuwen, presidente