WILLEMSTAD – ‘Stichting Humanitaire Zorg Curaçao’ (SHZC) i ‘Stichting Schoon Milieu op Curaçao’ (SMOC) lo entamá un kaso kontra Isla. For di 2010 e refineria tin un multa habrí di 75 mion florin  ku nan mester paga, si nan no kumpli ku e norma di lei pa deskargo di suafel.

Segun Peter van Leeuwen, presidente di SMOC, 2013 tabata un aña rèkòrt pa deskargo di suafel. “Tin mas suafel den airu awendia ku añanan anterior.” 1 di febrüari último, SMOC a midi un pik no nòrmal di suafel. Segun Henny Cornelia di departamento di medio ambiente i seguridat di Isla, esaki ta relashoná ku resíduonan di Isla ku a pega na kandela. Entre e resíduonan tabatin barínan ku e materia heru sulfúriko. E materia tambe tabata den  tera i esei a pone ku 1700 mikrogram pa kúbiko a keda deskargá.

SMOC tin mas ku dies aña ta lucha pa limpia e airu di huma ku e habitantenan den área mester biba kuné.  ”Mi no ta haña niun koperashon. Por ehèmpel mi tin hopi siman ta purba drenta den kontakto ku minister di Salubridat Ben Whiteman i ku Milieu en Natuurbeheer (MNB), te dia di awe nan no a kontestá. Mi no ta logrando di pone e problema aki riba agènda di gobièrnu. Mientrastantu, Isla por hasi loke nan ke, pasó no tin niun sorto di kòntròl pa wak si nan ta tene nan mes na norma.

Direktor di MNB, Pablo Burgos ta bisa ku nan a hasi un inspekshon den refineria. Segun Burgos, e no por bisa si Isla a tene su mes na e kondishonnan den último añanan, pasó e mes ta den e enkargo di direktor un aña i mei so. “Tin un rapòrt ta sali tur aña ku midínan ku GGD Amsterdam mester validá. “Nos lo tuma medidanan a base di e resultadonan di e kònsèpt rapòrt di 2013, ku ta den nos man aworakí.

Van Leeuwen ta opiná ku si Isla por tene su mes na e normanan i pèrmitnan proponé, e gastunan lo ta den desénas di mion. Segun Gobièrnu e ahustenan ku nan mester hasi lo kosta nan mil mión, pero esei ta solamente si modernisá Isla tambe. “Refineria Isla a afirmá ku nan lo ta dispuesto pa hasi ahustenan nesesario den un di e huisionan. Esaki no a sosodé te dia di awe.”

Aparte di e huisio, e presidente di SMOC lo biaha pa Ulanda pa konvensé polítikonan pa intervení den e kaso aki. “Ulanda ta bisa ku esaki ta un problema outónomo, pero nos ta haña ku e ta un problema di reino. SMOC tambe a bati na porta di korte oropeo di derechi humano, pasó no ta kedando kla ku Ulanda. Pa e posishon ku Ulanda tin, nan mester por a intervení masha dia den e situashon aki, segun Van Leeuwen. Minister Whiteman no tabata disponibel pa komentario.

Bron: Notisia 360