Resientemente Hachchi (D66) ku Van Raak (SP) a presentá dos moshon pa aktivá minister Plasterk pa kaba ku problema relashoná ku refineria Isla. Plasterk no a reakshoná riba esaki i p’esei SMOC a mand’é un karta riba 12 di òktober ku e echonan relevante (hurídiko): Isla ta aktua ilegalmente, pero no opstante esaki nunka gobièrnu hulandes no a kastigá Isla. Semper Plasterk a skonde tras di e asina yamá outonomia di pais Kòrsou pa atendé asuntu interior manera e problema ku Isla. Lástimamente, pa Plasterk. E no por hunga e wega akí mas despues di awe. Pasobra a aseptá un di e moshonnan awe den Parlamento (hulandes).

Ku e moshon akí Parlamento ta rekonosé ku e problemanan, tantu di mando komo di aspekto di medio ambiente, kousá pa Isla, ya ta eksistí pa algun desenio i ku “Hulanda den relashon ku Shell ta embolbí direktamente na orígen di e problema akí.” E moshon aseptá ta enserá ku Plasterk tin ku aktua “proaktivamente huntu ku pais Kòrsou” pa trese un solushon duradero pa e problema di Isla. Plasterk no por i no tin mag di bira lomba mas. Ni gobièrnu di Kòrsou. Klaro SMOC ta dispuesto, manera semper boluntariamente, pa yuda pensa kon. Pa kiko? Aire limpi. Awa limpi. Tera limpi. Tur esaki ta birando mas i mas asesibel pa Kòrsou. Kada inhabitante di Kòrsou (i turista) por probechá di esaki. Lesa aki e moshon ku a wòrdu aseptá awe: Moshon Isla di Hachchi ku Van Raak aseptá.