E último dianan a sali algun remarke den media komo si fuera SMOC ta eksigí 75 mion florin di Isla i asina ta menasá eksistensha di e refineria. E mensahenan akí no ta niun tiki korekto. SMOC ta informá kiko eksaktamente ta e kaso.
SMOC ta un di e 26 demandantenan den e kaso di 75 mion florin
E kaso di 75 mion florin ta un kaso di demandante superior Stichting Humanitaire Zorg i ko-demandantenan fundashon SMOC ku 24 habitante (4 di nan ta hulandes europeo, 20 ta yu di tera) di kua mientrastantu lástimamente unu a fayesé na kanser. Pues SMOC ta un di e 26 demandantenan.
KIKO SMOC TA?
SMOC ta un fundashon lantá na 2003 ku un solo meta: aire limpi pa e habitantenan bou di huma di Isla ku BOO. SMOC no ta pro seramentu di Isla.
SMOC ta eksistí danki na boluntarionan ku no tin niungun interes den tereno di Isla, nan no ta kumpra tereno i nan no ta wòrdu pagá pa e trabou ku nan ta hasi pa SMOC. Tin hende kontra SMOC ku ta pasa e redunan ei, pero niun di nan ta papia bèrdat. SMOC ta yuda habitante bou di huma, dor di bishitá nan, skucha nan i duna informashon ku sugerensha.
Direktiva di SMOC ta konsistí di profeshonalnan: dòkter di kas, ingeniero kímiko ku botikario. SMOC ta risibí konseho di ekspertonan tòp riba tereno di refineria. Tur ta boluntario, tur ta hasi loke nan ta hasi pa niun plaka.
DIKON ISLA MESTER PAGA BUT DI 75 MION FLORIN?
Si Isla tin ku paga 75 mion florin, esei ta pasobra hues den apelashon a kondená Isla na aña 2010 pa e but ei. Por imponé e but akí solamente si Isla ta emití mas dióksido di suafel ku ta pèrmití, pasobra esei ta peligroso pa salubridat. Isla sa esaki pa sinku aña kaba. For di 2010 e emishon di dióksido di suafel pa Isla no a mengua, sino el a krese drástikamente anto pa 2013 ekspertonan a konstatá ku Isla a emití mas dióksido di suafel ku tin mag. Ta p’esei demandantenan a disidí di para firme den nan derechi i laga Isla paga e but.
ISLA POR PAGA 75 MION FLORIN?
Korte a pone altura di e but riba 75 mion florin. Ta un montante enorme, pero segun korte no dje haltu ku esei lo hiba Isla den problema finansiero. Ta trata djis di algun dia òf siman di ganashi. Ademas intenshon di e but ta pa pèrkurá ku Isla ta hasi tur esfuerso pa mengua emishon di dióksido di suafel. Pero esei no a sosodé i e kehonan di habitante a krese enormemente. Kemen SMOC no ta menasá Isla ètòl den su eksistensha.
KIKO TA SOSODÉ KU E SÈN KU ISLA MESTER PAGA?
Si Isla mester paga, fundashon SMOC lo risibí 2 mion florin i piko. E otro ko-demandantenan pues ta haña 72 mion i piko. Ningun persona di SMOC ta risibí e sèn, nò, ta e fundashon. Ora SMOC lo haña e plaka, SMOC lo uz’é kompletamente pa e úniko fin ku SMOC tin, es desir aire limpi. Pa medio di yuda habitante bou di huma, por ehèmpel ku èrko, yuda nan muda, limpia e chèpèchèpè bèrdè, sostené nan ku ayudo médiko, paga remedi ètcetera. Un notario lo vigilá, si Isla mester paga but, ku e dos mion i piko florin ku SMOC lo haña komo un di e 26 demandantenan, ta kompletamente pa bienestar di e hendenan bibá den serkania di Isla.
SMOC no ta interesá den plaka pa su boluntarionan, ni pa tereno bou di huma, ni pa sera Isla. Kada akusashon ku SMOC sí ta interesá den un di e kosnan akí, ta mentira.
Na nòmber di direktiva di SMOC
Drs Peter van Leeuwen
