Aunke hues ta komprobá ku na 2013 Isla a aktua ilegalmente pasobra Isla a violá e prohibishon ku korte a formulá na 2010, e sentensia tambe ta laga sa ku ainda no ta kompletamente kla si a konfiská e multa imponé. I pesei mester anulá e beslagnan te dia ku hues a ekspresá veredikto definitivo tokante esaki, bou di kondishon ku promé Isla tin ku paga SHZC, SMOC c.s. gasto di prosès, esta un suma di mas ku 32.000 florin.

E motivashon mas importante ta e inklaridat di hues su sentensia di 2010 tokante lugá di e violashon. E lugá ta riba tereno di Isla, un eskoho ‘infelis’ segun veredikto di awe. Hues ta dikta ku TNO tabatin rason sientífiko di konstatá ku Isla a violá e prohibishon, i ku stAB no a refutá e ponensia di SHZC ku SMOC c.s., sino a fiha striktamente e lugá riba tereno di Isla.

Pa e momentu akí, ku e veredikto akí, basá riba e formulashon vago di korte na 2010, a salba Isla su peyeho. SHZC, SMOC c.s. ta deliberá si nan lo kuminsá prosedura di fondo pa ainda kita e inklaridat akí pa 2013. Pa por konstatá si na 2014 Isla a violá e prohibishon i si ta konfiská e multa imponé, hues a eksigí mientrastantu un investigashon di eksperto. Pa kita tur toke partidario òf inklaridat pa 2014, tantu eksperto di StAB komo esnan di TNO lo investigá e asuntu akí.

SHZC, SMOC c.s. ta ripití ku ta trata salubridat di e habitantenan i ku ora Isla surpasá e norma refineria ta kousa daño serio. E multa imponé aparentemente no a logra di motivá Isla pa baha e emishon di dióksido di suafel, i asina limitá daño na salubridat, manera por mira den e grafik akibou, di e kantidat di dióksido di suafel ku gobièrnu a midi na Beth Chaim.

Loke ta trata tur senario negativo pintá pa gobièrnu, Curoil, RdK ku Aqualektra den e último simannan, SHZC, SMOC c.s. ta nota ku mui probablemente lo konfiská e multa imponé pa 2014 tambe. Pues esei lo no bira niun sorpresa mas. Ta opvio sí ku gobièrnu, ni Curoil etc. no tin kontesta riba e problema kardinal ku kisas lo surgi na 2019 ora kontrakt di lease ku PdVSA ta terminá.

Norbert George                                                     Peter van Leeuwen

Presidente SHZC                                                   Presidente SMOC

Aki por lesa e veredikto: Vonnis10november2015