Resúmen: Konklushonnan i solushon gubernamental sigun punto di bista di SMOC.

Durante promé guera mundial Shell a kuminsá un refineria na Korsou. Asina Isla a kuminsá. Durante di dos guera mundial Isla a entrega hopi kombustibel na aliadonan. Hulanda a probechá inmensamente di esei i (inkonsientemente?) ta rekordá esei dia 4 mei. No opstante vários rapòrt i manifestashon públiko relashoná ku molèster pa medioambiente i salú públiko Shell a operá e refineria te 1985 sin ningun klase di pèrmit ambiental.[1] Korsou, un isla geográfikamente relativamente chikí a hañ’é na 1985 de repente ku un industria petrokímiko sumamente kompliká den su stoma, inklusive e “famoso” lago di asfalt. Gobiernu di Reino Hulandes tambe a hunga un ròl den esei. Porfin na 1997 a saka un pèrmit pa medioambiente, pero e pèrmit ei ta basá riba normanan di medioambiente di e Agensia di Medioambiente Norteamerikano (US EPA) ku ta data for di 1979, pues normanan antikuá i opsoleto. Ta di lamentá, pero Gobiernu di Korsou nunka tabata pro- aktivo i no a perkurá pa Isla kumpli ku e reglanan: no opstante no kumplimentu nunka Isla a haña un but. Despues di prosedernan largu den korte, dia 12 yanüari 2010 Hues den Korte di Apelashon a determiná Isla pa motibu di aktuashon ilegal[2] Ta di lamentá, pero te hasta despues di e señal hopi kla di hues Gobiernu no a reakshoná pa medio di medidanan gubernamental pa pone Isla kumpli ku reglanan di medioambiente. Ku e moralidat gubernamental den relashon ku Isla ku Gobiernu di Korsou a desplegá durante di dékadanan, no opstante tur e investigashon i rapòrtnan, nos lo ta poko realista di pensa ku Gobiernu ta bai pone Isla kumpli ku reglanan di medioambiente. Mientrastantu emishon i e molèster relashoná ku esei ta oumentá ketu bai, algu pa kua tur yu di Korsou tin ku paga un preis, pero e hendenan ku ta biba den e huma ta paga un preis sumamente haltu. E situashon den kua nan ta haña nan ta biba ta kontrali na nan derechinan fundamental manera ankrá den artíkulo 2 di Tratado Europeo pa Protekshon di Derechinan Humano. Minister di Defensa ta masha konsiente di e sirkunstansia i e sí a permití su personal muda. A yega ora pa stòp e mal gobernashon i faltamentu ku derechinan humano, a base di artíkulo 43, párafo 2 di Statüt di Reino Hulandes. Kon? E falta di boluntat i inkapasidat di Gobiernu di Korsou mester keda remplasá. Mester tuma un medida di supervishon haltu pa forsa Gobiernu di Korsou perkurá pa Isla kumpli ku reglanan di medioambiente, kompañá pa yudansa pa medio di personal ku konosementu tékniko i gubernamental apropiá.

Isla i algun anotashon geopolítiko.

Kasi 200 pais a firma un kombenio na Paris pa stòp di uza materia prima ku karakter fosil. Esei pa protehé bida di islanan manera Korsou mes. Irónikamente, sigun Departamentu di Energia di Merka, Korsou ta un di e 5 paisnan ku un emishon mas haltu di dióksido di karbon pa kabes di poblashon.[3] Masha mal propaganda pa Reino Hulandes, pa motibu di Isla. Hinter Reino Hulandes tin ku tene su mes na palabrashonnan di e Konvenshon tokante Diversidat Biológiko. Rapòrtnan tokante e situashon den Reino, partikularmente pa loke ta trata Korsou te ainda tabatin e meta di skonde e realidat mahos menshoná. E di sinku Rapòrt Nashonal di Reino Hulandes konsientemente a keda sin reportá informashon tokante Isla.

E kondishon den kua medioambiente di Korsou ta un problema sosial i ta peka kontra derechinan fundamental di hendenan ku ta biba den e huma di Isla

Resientemente Antilliaans Dagblad a kòrda su lesadónan ku tabatin keho i manifestashon kontra e polushon di Shell ya for di inisio di siglo anterior. [4] Aworakí, ku PDVSA, e problema ta ketu bai den notisia. Pa ilustrá: Kontinuamente ta surpasá sin ningun bèrgwensa normanan di medioambiente ku Organisashon di Salú Mundial a fiha pa loke ta trata emishon di dióksido di suafel i e polushon ta sigui oumentá ora Tuma na kuenta e promedionan anual na kuenta.

Fuente: Resultadonan verifiká di GGD Amsterdam, pa Pernis sifranan di DCMR.

Sigun “Air Quality Index (AQI) biba den e huma di Isla ta hopi peligroso, e ta kualifiká e kalidat di aire komo esun di mas malu i ta konsehá habitantenan pa no sali for di nan kas! Ta bin aserka e reportahe di “MOTE Marine Laboratory” ku Gobiernu di Korsou mes a paga pa hasi investigashon, i ku a bisa ku e porsentahe di hidrokarburo aromátiko polisíkliko ku ta kousa kanser ta un di esnan di mas haltu na mundu ku a yega di keda reportá. Banda di esei tin un kantidat di otro sustansia den e aire ku ta surpasá tur norma eksistente pa medioambiente na un manera eksorbitante. [5] E miseria di medioambiente aki den un pais ku e kantidat di habitante ku Korsou tin ta kousa di basta problema sosial. [6] En bista di e konklushonnan ya menshoná no por konkluí otro ku ta trapa derechi riba un ambiente limpi i saludabel di e hendenan ku ta biba den e huma, por ehèmpel a base di artíkulo 2 i 8, di Tratado Europeo pa Protekshon di Derechinan Humano i artíkulo 24 i 29 di e Tratado Internashonal pa Derechonan di Mucha i artíkulo 25 di e Deklarashon Universal di Derechinan Humano. Ta asina ei e komunidat ta sinti tambe, ya ku por ehèmpel ku regularidat mester manda muchanan di skolnan den besindario kas.[7]

Un sustansia bèrdè ta baha riba kasnan (mira anekso). Den 2005 EcoRYS a reportá ku tin tur aña pa poko 18 hende ku ta muri prematuro i ku míles di hende tin ku akudí na servisionan di kuido di salú, komo konsekuensia di e polushon dor di Isla. GGD di Korsou a reportá den 2007 ku famianan ku ta biba den huma di Isla lo ke muda pa bai biba otro kaminda. Den 2011 CBS a reportá ku 83.1% di hendenan di Wishi/ Marchena tin molèster di e huma di Isla. Wishi/ Marchena ta sufri práktikamente hinter aña di e polushon dor di e bientu nort- ost konstante. Gobiernu di Korsou miéntras tantu ta wak den otro direkshon, i ta laga e hendenan pa nan kuenta. Minister Hennis di Defensa sí ta laga su hendenan muda. Aparentemente no ta tur suidadano den Reino Hulandes tin mesun derechi, òf por ta ku e pasport hulandes di e hendenan di Wishi/ Marchena ta diferente for di esun di e hulandesnan europeo(?).

Mitonan ekonómiko di un banda i higiena ambiental na otro banda.

Tin hende sinseramente ta kere ku Isla ta nifiká finansieramente i ekonómikamente hopi pa Korsou. Esei ta leu for di bèrdat. Pa ilustrá: Banko Sentral a reportá resientemente ku debe di Korsou ta oumentá i hasta ta riba e norma ku IMF a pone. Unda i kon nos tin ku pone Isla, ku ta okupá mas o ménos 550 hèktar di tereno den e plachi ku Banko Sentral a pinta? Wèl, kantidat di kupo di trabou a baha di 12.631 den 1952 riba e poblashon chikí di e tempu ei te na mas o ménos 1000 kupo di trabou pa un poblashon muchu mas grandi, asina nos por lesa riba wèpsait di kompania anónimo di Gobiernu, Refineria di Korsou (RDK) Konforme e kontrakt entre Teritorio Insular di Korsou i PDVSA, Isla no tin nodi paga impuesto riba ganashi, riba importashon di krudo, ni riba biennan inmóbil. Komo konsekuensia di esei sentenáres di mion florin di ganashi ta disparsé bai Venezuela tur aña.[8]

Isla ta aportá ku nada mas ku un hür di apénas 20 mion florin pa aña. Resumiendo, Isla su aporte na Produkto Nashonal Brutu a keda baha e último dékadanan, i awor e ta apénas 4,4 % sigun Banko Sentral. Miéntras tantu gastunan pa kuido di salú ta basta haltu – sigun instituto di Salú Públiko di Korsou – 13,8 % di Produkto Interno Brutu. Un estudio ta kompará Korsou su nivel di gastu pa salú ku 64 otro pais, i solamente un pais so ta mas karu ku Korsou, lokual no ta bon pa e balansa di likides di Korsou. Te 2019 Korsou ta mará na PDVSA pa medio di un kontrakt ku ta choka Korsou; si nos no paga tinu e kontrakt ei ta keda prolongá outomátikamente te 2029.[9]

Hues den Korte di Apelashon a determiná ku Isla no ta kumpli ku pèrmit di molèster.

Isla no ta gusta, pero 12 yanüari 2010 hues sivil den un kaso den apelashon a konfirmá ku Isla ta komportá na un manera ilegal dor di keda sin kumpli ku e normanan mínimo establesí pa medioambiente.[10] Fundashon Kuido Humanitario di Korsou, SMOC i desena di habitante a hiba Isla dilanti di korte. Pa SMOC tabata mas kla ku di dia ku Isla hamas i nunka lo a preokupá ku e impakto sumamente negativo di e polushon ku e ta kousa. Nan a hasi tur sorto di manera pa tarda e prosedura. E habitante komun i koriente ku ta biba den e huma di Isla no tabatin ningun sorto di chèns di haña su derechi, pa kolmo ni serka Gobiernu di Korsou. Na lugá di Gobiernu mira interes públiko i para tras di su suidadanonan, Gobiernu su úniko mira tabata gerensia di Isla. Den práktika nunka Gobiernu a mustra Isla riba su deber pa kumpli ku lei di medioambiente. Artíkulonan 6.4.4 i 6.4.5 di e kombenio entre PDVSA i Gobiernu di Korsou ku tur probabilidat tin komo resultado ku claimnan di suidadanonan of NGO-nan pa motibu di daño dor di PDVSA na medioambiente ta bini parsialmente òf totalmente pa kuenta di Gobiernu di Korsou.[11] Ta bisto ku bon gobernashon i rèspèt pa derechinan humano relashoná ku polushon dor di Isla ta mal pará si nan ta dependé di Gobiernu di Korsou.

Artíkulo 43, párafo 1 i 2 di Statüt di Reino Hulandes.

SMOC ta komprondé ku ta difísil pa e aparato gubernamental di un isla chikí manera Korsou poseé tur konosementu nesesario pa kontrolá un industria kímiko kompliká manera e refineria, i pone Isla kumpli ku leinan eksistente. Na e momento di benta di e refineria dor di Shell na Korsou, Gobiernu di Reino mester a realisá su mes esei i rekonosé e diskrepansia grandi. E lago di asfalt so kaba mester tabata motibu di akshon gubernamental di parti di Reino. Awor, tantu aña despues, si bo pone aserka e falta di kapasidat gubernamental di parti di Gobiernu di Korsou, i falta di boluntat, ta bira bisto ku mal gobernashon i faltamentu ku derechinan humano a hasi nan entrada. Korsou no a kumpli ku artíkulo 43, párafo 1 di Statüt di Reino Hulandes, ku ta bisa tekstualmente:

• “Elk der landen draagt zorg voor de verwezenlijking van de fundamentele menselijke rechten en vrijheden, de rechtszekerheid en de deugdelijkheid van het bestuur.
• Het waarborgen van deze rechten, vrijheden, rechtszekerheid en deugdelijkheid van bestuur is aangelegenheid van het Koninkrijk.”

Tempu a yega pa apliká artíkulo 43, párafo 2 den relashon ku Isla, a ménos ku artíkulonan den lei ku tin meta pa perkurá pa un medioambiente limpi ta morto. Ounke e konfiansa di SMOC a sufri hopi, SMOC ke keda kere ku den Reino Hulandes e leinan ya menshoná lo keda respetá.

Pues SMOC simplemente kier hasi dos pregunta:

• Ken ta kere ku Gobiernu di Korsou ta kumpli ku reglanan di bon gobernashon, pa loke ta trata Isla?
• Ken ta kere ku no tin kuestion di no kumplimentu ku derechinan humano, pabou di Isla pa motibu di polushon di aire dor di Isla?

• Sustansia berde ku a baha riba kas di hende:

[1] E siguiente link ta duna un resúmen di dato, rapòrtnan i susesonan, sin nota di splikashon: http://www.stichtingsmoc.nl/2013/04/smoc-april-2013-overzicht-isla-geschiedenis/

[2] http://www.stichtingsmoc.nl/2010/01/eindvonnis-civiele-procedure/

[3] http://www.stichtingsmoc.nl/2015/11/cop21-alert-caribbean-part-of-dutch-kingdom-belongs-to-top-5-co2-emissions-per-capita/

[4] Ton de Jong, ‘Schone lucht is geen luxe (6)’, Antilliaans Dagblad, 15 mei 2015.

[5] http://www.stichtingsmoc.nl/2011/01/onderzoek-telt-tno-2007/

[6] Korsou: 354 habitante pa meter kuadrá. En komparashon Merka tin 32 habitante pa meter kuadrá. E importansia di kumplimentu ku normanan di medioambiente ta mas grandi.

[7] Lesa por ehempel Amigoe di 15 yanüari 2016: ‘Derde dag op rij stank’

[8] http://www.stichtingsmoc.nl/uploads/Ecorys-NEI-2005.pdf

[9] Den Amigoe SMOC a publiká sugerensha kon por sigui despues di 2019. Lesa: http://www.amigoe.com/ingezonden/30-ingezonden/220084-reactie-smoc-op-liberia-peters-naastenliefde-en-economie. Konstatá ku Gobiernu di Korsou ta kana atras riba e proposishonnan di maneho di EcoRYS, fechá 2012. http://www.stichtingsmoc.nl/2013/07/ecorys-2012-rapport-is-nu-beschikbaar/

[10] http://www.stichtingsmoc.nl/2010/01/eindvonnis-civiele-procedure/

[11] http://www.stichtingsmoc.nl/2016/01/curacao-government-lack-of-good-governance/