No tin niun tiki duda. Shell a laga hopi shushedat atras na Kòrsou, ku e lago di asfalt, mei mei di añanan 80. Un mal kaso i p’esei SMOC (Fundashon Medioambiente Limpi na Kòrsou) a pone e kaso akí hopi biaha kaba bou di atenshon di Parlamento hulandes. Segun promé minister Whiteman Parlamento hulandes, ku ta hopi preokupá debí na mal maneho i violashon di derecho humano pa loke ta trata Isla, no ke tende niun keho tokante Shell, pero esaki no ta bèrdat. Ata e echonan tras di otro.
Dia 29 di òktober 1996 Parlamento hulandes a tuma un moshon di Christen Unie ku Groen Links. Den e moshon akí a supliká gobièrnu hulandes entre otro pa laga Shell paga (gran parti) pa limpia e lago di asfalt. Ku esaki SMOC no ke libra di ningun manera e papel ku Hulanda a hunga den bendementu di Isla. Di pursi, potensia di maneho di un gobièrnu chikitu komo esun di Kòrsou pa mantené un industria petrokímiko gigantesko na lei, ta nihil. Gobièrnu di Hulanda a atmití esaki kaba na komienso di añanan 70. Esaki a kondusí e tempu ei na lantamentu di servisio ambiental DCMR; munisipio grandi manera Rotterdam ku su refineria enorme a laga otro instansia tuma enkargo di su tarea kompleho di kontrolá medioambiente. P’esei no ta niun tiki sivilisá di Hulanda ku a obligá Kòrsou pa manehá Isla. Dia 13 di òktober 2015, Parlamento hulandes a revoká esaki ora el a aseptá un moshon kaminda a deklará ku Hulanda ta enbolbí direktamente, pa motibu di su relashon ku Shell, na orígen di e problematika ambiental. Esaki ta un bon ehèmpel di atmití fout komo kabayero. Ken ta sigui?
EcoRYS, mandá pa gobièrnu di Kòrsou, a raportá, na aña 2005 kaba, ku Isla ta kousa anualmente morto prematuro di 18 hende, minimalmente, i ku míles di persona mester apelá na kuido médiko pa motibu di emishon shushi di Isla; anto ta e Yu di Kòrsou pagadó fiel di impuesto tin ku karga tur gastu! Parlamento di Kòrsou no tin kunes ku e rapòrtnan akí, pasobra te dia di awe, nunka gobièrnu di Kòrsou a mantené Isla na lei. Ni sikiera ora hues di apelashon, na aña 2010, a dikta ku Isla por tuma medida relativamente barata, si kompará gastu ku ganashi pa aña, pa kumpli ku pèrmit ambiental (fofo).
Mientrastantu ganashi ta bai Benesuela aña tras di aña, i e aporte di Isla na entrada di gobièrnu di Kòrsou ta mengua ketu bai, pero molèster pa medioambiente siudadano di Kòrsou tin ku karga i gastu di kuido médiko ta siudadano di Kòrsou tin ku pag’é. Mester para e marea aworakí mes i Parlamento hulandes ta komprondé esaki, pasobra e echo ku Kòrsou ta bira kara wak otro banda ora ta trata polushon di Isla ta mala boluntat di parti di gobièrnu kurasoleño; esaki ta apart di e defisiensia di potensia di maneho pa loke ta trata e lucha kontra un gigante multinashonal.
Ta p’esei lo ta bon si Parlamento di Kòrsou sigui Parlamento hulandes i trata un òf mas moshon. Unu kaminda ta rekonosé ku Kòrsou a faya den su maneho. I trata mesora un di dos moshon kaminda ta mantené Isla na lei ku forsa (retroaktivo). No ku e intenshon pa sera Isla, nò, sino den forma di un but supstansial komo rekompensa pa tur molèster i gastu di kuido médiko ku Isla a kousa. Kua miembro di Parlamento, den e estado di derecho akí, ta bai tuma inisiativa pa e moshonnan akí?
Drs. Arjan Linthorst (miembro di direktiva di SMOC)
