16 februari 2016 – Despues di un kantidat di moshon den “Tweede Kamer” awe a yega por fin na e konklushon ku polítikamente por konstatá ku aña aden afó a falta ku derechinan humano di e hendenan ku ta biba den e huma di Isla. Esei ta e posishon di mayoria di “Tweede Kamer”. No ta nada straño ku e Buro Sentral di Estadístika di Korsou (CBS) a reportá na 2011 ku 83.1 % di habitantenan di Wishi/ Marchena a keha di molèster i holó malu di Isla (fabor tuma nota di e gráfiko mas abou den e artíkulo aki). Ku e moshon aki riba mesa mester kumpli den un lapso di tempu di tres luna ku nan derechi riba un ambiente limpi pa nan biba. Tempu pa esei a yega te pasa, i SMOC ta di opinion ku nan meresé esei. Huntu ku nan SMOC a pidi hopi tempu kaba pa kambio, i laga nos spera ku awor si e deseonan hustifiká aki ta keda satisfasé.

“Tweede Kamer” a konkluí tambe ku pa aña largu tabatin mal gobernashon na Korsou, den e sentido ku Gobiernu no a kumpli ku su responsabilidat di perkurá pa Isla kumpli ku reglanan establesí, ku konsekuensia ku e habitantenan di Wishi/ Marchena pa aña largu a keda perhudiká. Den un rapòrt ku Gobiernu di Korsou mes a laga traha tin pará ku no opstante diferente veredikto den korte di hustisia Gobiernu di Korsou a neglishá su responsabilidat di pone Isla kumpli ku e lei di medioambiente a base di e pèrmit ku Gobiernu a otorgá e refineria na 1997 . Página 82 di “National Integrity System Assessment: Curaçao” ta bisa tekstualmente:

”Furthermore, for many years the environmental organisation Stichting Milieu Organisatie Curaçao (SMOC) has been trying to limit the pollution caused by an oil refinery in Curaçao. The organisation initiated and carried out various court proceedings to achieve this. Despite several court decisions in SMOC’s favour, the government refuses to enforce the Nuisance Licence which was granted in 1997 to the refinery.”

Ta mas kla ku di dia ku no por sigui hinka kabes den santu, i hasi komo si fuera e problema no ta eksistí. Na fin di 2015 “Tweede Kamer” a rekonosé e situashon ariba deskribí den un moshon kaminda ta rekonosé ku Hulanda den relashon ku Shell ta direktamente envolví den e problemátika di medioambiente. Ke men, palabra awor ta na Parlamentu i Gobiernu di Korsou pa asumí nan responsabilidat i pone Isla kumpli ku forsa retro-aktivo ku eksigensianan di medioambiente. ”Tweede Kamer” ademas asumí responsabilidat pa e situashon na un manera konkreto dor di tuma un moshon den kua Hulanda ta ofresé Korsou yudansa gubernamental, pa por yega na pone Isla kumpli ku e eksigensianan. PDVSA mester por kumpli, pasobra nan ganashi ku e ta hasi ku e refineria ta eksorbitante, i ta solamente un parti chikí nan lo tin ku uza pa drecha e situashon. Esei tabata konklushon di hues ya den 2010! Esun ku ta haña ku korekshon di e situashon di medio ambiente no ta nesesario tin un menospresio enorme pa e hende komun i koriente di Wishi, Marchena i Buena Vista.

Dióksido di suafel (SO2) 2010- 2015 (Averahe Anual mcg/m3)

Fuente: Gobiernu via www.luchtmetingencuracao.org

(Gráfiko kompilá do di SMOC)