For di baul (1985): nótulo di Konseho di minister di estado ta masha sekreto (pero awor no mas)

Refineria Isla aktualmente ta hopi diskutí. Kiko e tereno di Isla lo ofresé ora e kontrato aktual ku PdVSA ta kaba? Pero prinsipalmente habitantenan bou di huma ta pensa: Ki dia porfin e emishon apsurdamente grandi ku ta polushoná medioambiente ta yega su fin? Ta e polushon akí SMOC ta prinsipalmente preokupá di dje. Pa kolmo Parlamento hulandes a aseptá dia 16 di febrüari último un moshon kaminda a nota violashon di derecho humano i mal maneho pa loke ta trata (òf ta falta di trata) mantenshon di maneho di Isla. Den e avalancha di moshon di Isla ku a fail e dia ei, tambe a tuma un moshon , meskos ku na por ehèmpel 2013 Senado hulandes a hasi, kaminda Hulanda ta ofresé ayudo tékniko riba nivel di maneho. Un bunita chèns pa Kòrsou, pero SMOC no a ripará ainda ku mandatarionan di Kòrsou ta brasa gabinete hulandes pa e gesto akí, ku e konsekuensia ku un grupo di inspektor medioambiental a bula yega Kòrsou pa pone òrdu. SMOC ta haña esaki algu tristu, pasobra de fakto Kòrsou su servisio ambiental no ta funshonando, konforme investigashon di PWC na 2011 i resientemente di Kontraloria General. Bon mirá esaki no ta straño, pasobra gobièrnu di Kòrsou tampoko no por realisá esaki, asina aparentemente èks Minister Presidente Maria Liberia-Peters sa, di pursi el a informá Konseho di minister di estado, na 22 di mart 1985, tokante e negosiashonnan ku Shell, na e siguiente manera:

,,Ademas, Shell a duna tiki informashon tokante e situashon na refineria, miéntras ku Shell su intenshon ta pa pasa maneho di refineria pa gobièrnu antiano. Tambe no ta tene kuenta ku e hecho ku Antia komo pais den desaroyo ta falta kuadro tékniko pa manehá refineria… E [Liberia Peters] ta apelá na gabinete hulandes pa yuda Antia den e negosiashonnan akí. Momentu pa e yudansa akí a yega aworakí, pasobra e no sa kon Antia riba su propio forsa por yega na un fin satisfaktorio di e negosiashonnan akí.”

Eksaktamente. Ta e kos akí ta loke SMOC ta bisa aña aden aña afó. Gobièrnu di Kòrsou, aparte di a mustra su mala boluntat pa manehá, ta falta potensia di mando pa mantené Isla na un manera tékniko ambiental. Ayudo for di, i pagá pa, Hulanda ta mas ku bonbiní. Laga nos ta honesto: den e tempu ei, Hulanda mes, ku su eksperensia amplio ku mantenshon di industria kímiko kompleho, por a sa ku gobièrnu di Kòrsou no tabata por mantené medioambiente. Hulanda no tabatin basta bista riba e impakto di Isla pa medioambiente. Pero ya, mihó lat ku nunka.

Lesa aki nótulo di e Konseho di minister di estado, pasobra nan ta ‘masha sekreto’: Notulenrmr22maart1985.

Reacties zijn gesloten