Apresiabel kabayero- i damanan di Servisio medioambiental,
Polushon di airu pa Isla/BOO ta keda krese, manera SMOC a pronostiká hopi aña kaba, i ta buta e hendenan bou di huma ta biba den sirkumstansianan inhumano, ku konsekuensia grave pa nan kalidat di bibá i salú.

Gobièrnu di niun manera òf otro, partikularmente promé minister Ben Whiteman, aparentemente no ta konsiente di e gravedat di e situashon, i nan no ta mustra intenshon pa remedi’é. Nos ta haña straño ku di tur e palabrashonnan den e reunion intenso ku nos a hiba ku boso, huntu ku CAE, riba petishon di hues van Schendel, niun palabrashon a resultá na nada ainda. Ta asta e midínan èkstra, aparentemente, nos promé minister a posponé nan.

E chèpèchèpè bèrdè ketubai kresiente, holó stinki i bochincha ku e konsentrashon (ku boso mes a midi) di dióksido di suafel ku na 2015 a konosé un average di aña rèkòrt di 225 mikrogram pa meter kúbiko (!), ta sufisiente rason pa atrobe pidi atenshon pa e problemátika serio akí.

Kasi sigur ta BOO ta kousa e pèchèpèchè bèrdè den barionan manera Boka Sami. Di fuente fidedigno nos a haña sa ku no ta trata e problema akí pasobra na BOO no tin konosementu kon ta hèndel e problema akí. Kon ta posibel ke te awe boso no a sigui investigá e stòf ku potensialmente ta kontené materia ku ta kousa kanser i ku ta den e rosea ku 20.000 hende ta hala? Nota bon ku nos promé minister a anunsiá dos aña pasá kaba un investigashon kompleto pa para e miseria akí.

Por mira e kresementu di e pèchèpèchè bèrdè di siman pasá riba e potrèt athunto, i e potrèt di e chimenea di BOO ta mustra un emishon enorme; kon por, ki tin den e emishon, kiko ta e státus di e 3 ESPnan den e chimeneanan di BOO? Boso por kontestá e preguntanan akí?

Kon ta para ku e SRUnan, SWS, Final Oil Catchernan? Nunka nos no a haña kontesta riba e preguntanan ku nos ta hasi aña tras di aña kaba, ni nos por a konsultá niun rapòrt di Isla i BOO. Solamente pasobra hues a insistí mi por a konsultá dato di Isla, pero awor ku e emishon di materia bèrdè, ku ya ta tuma lugá pa 2 aña largu, e nesesidat pa tira un bista den e relatonan di BOO a bira mas urgente.

Moshonnan

E moshonnan ku parlamento hulandes a tuma no ta ofresé niun tiki duda: Parlamento su mayoria ta haña ku tin mal maneho na Kòrsou pasobra gobièrnu no ta mantené òrdu, i esei ta enserá ku gobièrnu ta violá derecho humano. Awor ta Kòrsou su turno pa baha, denter di tres luna, huntu ku Hulanda su yudansa, e emishon kontaminá i dañino di Isla i BOO supstansialmente.

Solushon na plaso korto

E manera mas simpel pa baha e emishon ta, usa kombustibel ku ménos suafel aden. Por kuminsá pasa na gasolio ku un nivel di suafel di maksimalmente 1%. Fin di mart nos baké di refineria ta yega Kòrsou for di Hulanda. Nos ta ofresé boso pa e duna informashon kon por trata i baha e emishon strukturalmente.

Apelashon urgente pa konsultá relato

Gustosamente lo nos pasa otro siman pa konsultá e rapòrtnan anual di Isla ku BOO (entrante dia promé di mart mester a entregá nan) ku ta den boso poseshon. Señor Cornelia (di Isla) resientemente a atmití na StAb i TNO -durante un kombersashon kaminda SMOC tambe tabata presente- ku ta trata di relato públiko, ku por entregá na GMN i ku por konsultá na GMN. Mira tambe e pèrmit di BOO (CUC), entre otro artíkulo 2.2. i 2.12.

Gustosamente nos ta tende na plaso korto bo kontestanan riba nos preguntanan i pronto nos ta spera traha un sita pa nos por konsultá e informashon rekerí.

Un saludo preokupante,

den nòmber di SMOC,

Drs. Peter van Leeuwen

Presidente di SMOC

*