WILLEMSTAD – SMOC i Fundashon Kuido Humano Kòrsou (FKHK) ta informá komunidat ku gobièrnu atrobe no ta kumpli ku su deber stipulá pa lei. Atrobe gobièrnu ta ninga di duna SMOC i FKHK un kopia dje reportahenan periódiko ku tantu Refineria ISLA i BOO pa lei mester entrega na ministerio pa salubridat públiko i medio ambiente.

SMOC i FKHK ta referí na e pèrmit di molèster di tantu Refineria ISLA i BOO, kual ta stipulá ku ámbos kompania mester entrega un reportahe ku ta kontené informashon tokante e supstansianan venenoso ku a keda emití den airu durante e aña anterior. Meskos lei ta preskribí ku gobièrnu tin e deber pa fasilitá kalke siudadano òf organisashon ku ta pidi un kopia dje reportahenan aki pa asina establesé na kua peliger dañino nan a keda someté.

Sinembargo, no opstante ku tantu minister i su ministerio di salubridat públiko i medio ambiente ya kaba a rekonosé via e-mail ku bèrdat nan tin e deber pa lei di parti e reportahenan ku SMOC i FKHK, gobièrnu ta ninga di kumpli ku su deber.

SMOC i FKHK ta atvertí komunidat adelantá ku dje forma aki gobièrnu mes ta yama SMOC i FKHK afó pa akudí na Korte, pa despues gobièrnu reklamá ku SMOC i FKHK ta perhudiká e operashon di Refineria ISLA i ku ke ser’e. Kaba ta gobièrnu mes ta esun ku ta instigá problema, konflikto i kaso den Korte.

P’esei SMOC i FKHK un bes mas ta informá komunidat adelantá dje intransigensia i falta di transparensia di parti di gobièrnu. Ya si SMOC i FKHK keda forsa aweró pa akudí na Korte, henter komunidat sa kon e wega ta keda hinka den otro, esta, ku gobièrnu mes ta hasi todo por todo pa krea opstákulo ku ta kaba den Korte. Esaki pa despues gobièrnu kore buska publisidat i akusá SMOC i FKHK di tur sorto di kos. Un bes mas a keda demonstrá ku ta gobièrnu mes ta e problema prinsipal ku ta peligrá futuro di Refineria ISLA, asina e presidentenan di tantu SMOC i FKHK ta duna di konosé.