Apresiabel minister Plasterk,
SMOC tabata masha kontentu ku e moshon ku “Tweede Kamer” Hulandes a tuma dia 15 di febrüari. “Tweede Kamer” su enkargo na bo no a laga ningun lugá pa duda:
“… ta pidi Gobiernu Hulandes pa mas lihé posibel drenta den konsulta ku Gobiernu di Korsou, i enfatikamente pidi paGobiernu di Korsou tuma tur medida rasonabel pa baha den tres luna emishon di sustansianan ku ta hasi dano te ku un máksimo i pa raportá resultadonan di e konsulta… “
Durante e tres lunanan despues di e moshon nada, pero apsolutamente nada no a drecha. Al kontrario, tur kos ta meskos of pió, manera por konstatá a base di resultadonan di tantu midimentu, komo e sustansia berde ku a sigui baha riba nos hendenan, i e malkontentu di suidadanonan rabiá. Habitantenan a hasi denunsia na Ministerio Públiko, a entregá keho na Kolegio Disiplinario di Médikonan i atrobe a firma un petishon pa Gobiernu perkurá pa nan por haña aire limpi. Clean Air Everywhere Curacao (CAE) a start un prosedura di fondo kontra Gobiernu di Korsou. Ekspertonan riba tereno legal, Profesor Rogier i Karel Frielink no tabatin ningun bon palabra e e sentensia di hues di òktober 2015 den e huisio sumario di SMOC kontra Gobiernu. Gobiernu no a kumpli ku e promesanan ku Gobiernu a hasi na hues durante e huisio sumario pa atende ku e pulushon.
Mas aleu, SMOC ta mustra riba e falta di akshon di parti di promé minister Ben Whiteman i su ekspreshonnan den direkshon di Hulanda i gruponan ku ta sali na defensa di salú i medioambiente. Hues a husga ku e akshon di skòrs e sekretario di Konseho di Minister, Raul Henriques, ta kontra lèi, tòg promé minister ta sigui ku su akshon ku ta ilegal. Kòrda tambe ku Representate di Hulanda na Korsou tabatin un papel den e akontesimentunan i argumentashon ilegal di Whiteman pa skòrs Henriques. Whiteman a instalá un tim, MDPT, pa supuestamente prepará futuro di refiniria, pero MDPT ta komportá enemistoso, no ta duna informashon, no ta komuniká ku prensa i mientras tantu ya kaba a gasta hopi mion florin.
Promé minister Whiteman ta esun responsabel pa no- kumplmentu di parti di Gobiernu ku promesanan ku Gobiernu a hasi dilanti di hues na òktober 2015. Entre e promesanan ei tin un investigashon mas detayá di e sustansia bèrdè ku ta kousa kanser i hasi daño na miles di kas, investigashon pa sa e konsekuensianan pa salú di hende, midimentu adishonal di metalnan pisá dor di GGD Amsterdam, i dunamentu di informashon na siudadanonan. Manera SMOC a atvertí hues durante e kaso den korte, Whiteman no ta kumpli ku loke el a primintí, i esei ta e resultado awor tambe. Es mas, ora ku hues a enkargá SMOC pa sinta na mesa i traha huntu amtenarnan ku ta raportá na Whiteman pa remediá e situashon, SMOC a eksperensiá ku Whiteman personalmente tabata torpediá tur inisiativa pa drecha e situashon, pa hasi investigashon of pa informá habitantenan.
Whiteman tabatin tur atenshon i urgensia pa atendé ku sindikatonan ku siman pasá tabata preokupá ku futuro di refineria, pero no tin ningun purá ora ta trata derechinan fundamental, protekshon di salú, kalidat di bida di hendenan ku ta biba den e huma di mesun refineria. Al kontrario!
Riba petishon di Roelof van Laar i mas miembro di “ Tweede Kamer” abo, minister Plasterk, a manda un karta tokante e konsulta ku bo tabatin den konteksto di e moshon di “ Tweede Kamer” ya menshoná. Pa nos sorpresa e kontenido di bo karta no ta reflehá e situashon manera deskribí mas ariba, ni tampoko ta kontené ningun kontesta riba e pregunta si Gobiernu di Korsou a/ of ta kumpli ku e petishon ku tin den e moshon.
Bo karta ta menshoná ku Whiteman tin un plan konkreto pa e verano aki hasi análisis di e prosesonan di refinashon i pa traha leinan: e plannan ei no ta nada mas ku promesanan bashí, i bergonsoso. Den Haag por ta lubida lihé, pero nos no. Hopi sèn di SEI (esei tabata na 2008!) a keda aprobá pa drecha situashon rondo di refineria. Nos tabatin hopi speransa e tempu ei, pero nada di e plannan no a resultá, tur kos a kaba na aros i koko. Sekretario di Estado di e tempu ei, Ank Bijleveld, a felisitá presidente di SMOC personalmente ku aprobashon di e proyekto di SEI, pero pa kiko e felisitashon tabata, Dios lo sa! Mientras tantu, ya SMOC tin 15 aña ta pidi atenshon i korekshon di e situashon.
Pa hopi aña kaba ta konosí kiko ta robés i kiko mester hasi pa baha e polushon drástikamente. Mas resien ekspertonan di StAB a raportartá ku luho di detaye na Whiteman kon serio e polushon ta i kua ta e medidanan ku por tuma ku fasilidat. Ecorys (NEI) a pone den rapòrtnan di 2005, 2011 i 2012, kiko ta bai robes i kiko mester hasi pa koregí, di tal manera ku a lo menos ta kumpli ku e eksigensianan ku tin den e lei eksistente. Pues trahamentu di lei nobo ta importante, pero urgente ta pa kumpli ku e lei ku tin awor aki kaba. Tur dia ku e situashon di polushon sigui, ta sigui trapa derechinan ku tin ankrá den Tratado Europeo di Drechinan Humano. E konsekuensianan i kuenta di esei lo keda presentá na Reinu Hulandes, i na Hulanda.
Na mart 2016 SMOC a ofresé na Gobiernu di Korsou pa un eksperto tòp, ku ta konsehá SMOC tambe, kosehá Gobiernu gratuitamente kon relativamente fasil por baha e polushon imediatamente ku 50% i evitá emishon di e sustansia bèrdè. Gobiernu Whiteman no a hasi kaso, ni a duna komentario. Hasta e amtenarnan di Gobiernu envolví ku e trabou a keda desapuntá.
SMOC ta masha interesá na sa ta kua ta bo motibunan pa manda un karta pa “ Tweede Kamer” ku un kontenido ku no ta reflehá e realidat, ku ta duna elogio na Whiteman i asina sosten’ é den su akshon makabre di laga habitantenan stek den e aire sushi.
Pa SMOC, bo karta ta habri un kaminda pa e “ dòkter” sigui ku e komportashon ku el a bin ta desplegá. Ta di spera ku “Tweede Kamer” si ta kambia e rumbo ku kos ta bai. Nos ta spera ku ta pronto, pasobra kada dia mas sin solushon, i ku e komportashon di e promé minister di Korsou, ta a kosto di salú i bida di hende.
SMOC ta pidi ku tur rèspèt bo reakshon riba e karta aki, i ta keda den espera di bo kontesta.
Atentamente,
Direktive di SMOC:
Drs. Peter van Leeuwen (botikario)
Dr. Adriana Boersma (dòkter di kas)
Drs. Arjan Linthorst (dosente di kímika)
FB smoc.curacao
Twitter smoccuracao
