Komunikado di prensa: “Parlamento mester suprimí menospresio: Wishi/Marchena ku Buena Vista i otro lo apresi’é”

Den un último intento SMOC a pidi Parlamento di Kòrsou, dia 9 di febrüari 2016, pa eksigí di gobièrnu kurasoleño pa mantené atministrativamente Isla mesora. Kontesta tabata ketu, manera nos a kustumbrá añanan largu kaba. Dia 16 di febrüari 2016 mayoria di Parlamento hulandes a rekonosé ku na Kòrsou pa loke ta trata Isla tin malmaneho i ta violá derecho humano. Pa SMOC esaki tabata un novedat parlamentario.

Ta bon ku polítikamente ta rekonosé esaki, pasobra dia aden dia afó, hende bou di huma di Isla ta paga e preis mas haltu pa e emishon shushou i e echo ku mandatario ta bira kara wak otro kaminda: esta nan salubridat. Ya na aña 2005 EcoRYS a konstatá, basá riba postulashon kouteloso, ku anualmente míles di hende mester apelá na kuido médiko pa motibu di emishon di Isla. Tambe EcoRYS a kalkulá ku anualmente 18 hende ta muri prematuramente. Mientrastantu e emishon ta kresiendo mahos. Por ehèmpel: tantu pa dióksido di suafel (SO2) komo pa e PAK (hidrokarburo polisíkliko aromátiko) ku ta kousa kanser, Kòrsou bou di huma di Isla ta den tòp mundial. Un onor dudoso, pero esaki ta klarifiká dikon Ofisina Sentral di Estadístika (OSE) ta raportá ku 83,1% di habitante di Wishi ta eksperensiá molester. Mester para esaki pa medio di baha emishon di Isla drástikamente, segun e moshon ku Parlamento hulandes a tuma dia 16 di febrüari 2016. I mester kumpli ku esaki denter di tres luna, segun e moshon ta dikta. Nada di esaki, lástimamente. Dia 21 di mei 2016 SMOC a mustra ku e emishon no a baha niun tiki (mira e gráfika di dióksido di suafel akibou). Kousa: gobièrnu di Kòrsou no ta mantené Isla atministrativamente. Den e kaso ei un otro novedat parlamentario tin ku presentá: gobièrnu di Reino mester laga drenta na vigor artíkulo 43 di statüt di Reino pa asina mantené Isla atministrativamente. Ta un tiki straño ku siman pasá Parlamento hulandes a presentá poko débil, pasobra nan ke tende promé e opinion di Parlamento kurasoleño pa loke ta trata mantenshon atministrativo di Isla riba término kòrtiku. SMOC no gusta esaki mashá, ounke SMOC tambe tin algun pregunta pa e mandatarionan:

Boso ta di akuerdo ku ta violá derecho humano (por ehèmpel Tratado Europeo di Derecho Humano, art. 2, 8 ku 10), ya pa hopi aña, di hende bou di huma di Isla. Si boso kontesta ta negativo, dikon nò?

Boso ta di akuerdo ku gobièrnu di Kòrsou nunka no a mantené Isla atministrativamente pa motibu di inboluntat polítiko ku un Serviso Ambiental ku no ta funshoná? Ora bo ta kontestá nò, dikon nò?

E ora ei, boso ta di akuerdo ku mayoria di e polítikonan na Kòrsou a menospresiá pa añanan largu hende bou di huma di Isla? Si bo ta di akuerdo, bo por ta asina noble di ofresé pordon públikamente?

SMOC ta warda boso kontestanan ansiosamente.

Jantmapril2016SO2BethChaimPap

 

Reacties zijn gesloten