E realidat amargo ku míles di habitante ta enfrentá tur santu dia ta e gran kantidat di huma ku ta venená e aire i laga un sustansia  bèrdè atras. Sigun rapòrt di  CBS (2011) di kada 5 habitante di Wishi/Marchena 4 ke bai biba den otro bario pa motibu di e aire sushi. Ta  gran kantidat di un meskla venenoso ta keda plamá tur dia riba e barionan. E kantidat di dióksido di suafel ku a midi so kaba ta hasi hopi daño na salú,  por ehèmpel ta kousa kanser na pulmon i iritashon di wowo (mira e gráfiko pa tuma nota kuantu dióksido di suafel tin den aire). Sigun e rapòrt di Ecorys-NEI (2005) e situashon ta inhumano i ta nifiká trapamentu di derechinan humano, ku konsekuensia ku tur aña míles di hende tin ku buska kuido pa nan salú i sigur 18 hende ta muri mas trempan.

Último añanan abitantenan ta informá SMOC ku regularidat tokante e sustansia bèrdè ku ta pega riba nan propiedat (mira potrèt mas abou).  Un par di dia pasá e korant Vigilante a pone imágennan ku nan a filma riba Facebook. E imágennan ta papia palabra kla!

Investigashon ku TNO a hasi  na 2015 a indiká ku e sustansia bèrdè ta pata- pata di vanadium(pentaoxide). Un investigashon publiká den Journal of Exposure Science and Environmental Epidemiology (Yuan e.a.) a mustra ku e vanadium ei ta resultá den pulmon di hende tambe. Serka hende ku ta biba bou di huma di un refineria a haña vanadium den nan urina . No tin motibu pa esei ta otro na Kòrsou, loke ta hopi serio pasobra vanadiunpentaoxide ta kousa kanser di pulmon.

Na Kòrsou, e stòf fini ku a midi na Beth Chaim den forma di TSP (total suspended matter’) ta kontené vanadiumpentaoxide. GGD Amsterdam a midi TSP último añanan na Kòrsou,  i den nan reportahe bo ta mira ku klaramente tin mas TSP den aire (mira gráfiko mas abou, na man drechi). Luna pasá a kibra tur rèkert, ku 10 bia mas tantu TSP, algu ku nunka ainda SMOC no a mira (mira gráfiko mas abou, na man robes). Stòf fini riba su mes kaba ta kousa kanser, hasta ora e kantidat di stòf ta poko.

Ya ta hopi tempu ku tin trapamentu di derechinan humano ku un sushamentu di medio ambiente sin presedente. SMOC ta puntra su mes ta ki importansia e temanan ei ta bai haña den elekshon binidero. Lo tin un debate na radio òf televishon? Òf lo sigui gaña e pueblo ku promesanan falsu, ku Gobièrnu ta bai pèrkurá pa aire limpi pa nos abitantenan? Kua di nos futuro parlamentarionan i gobernantenan lo tin e kurashi pa di berdat- berdat koregí e situashon?