Ya ta hasi 9 aña ku TNO a raportá ampliamente tokante e impakto dje aktividatnan petrokímiko na Kòrsou. Den e temporada ei TNO a bati alarma tokante e nivel di vanadio den aire, a midi 51 ng/m3 (esta: nanogram pa meter kúbiko). Un tal nivel ta masoménos 5 biaha mas haltu ku esun ku ta bini dilanti den un estudio di Yuan ku otro hende (‘The distance-to-source trend in vanadium and arsenic exposures for residents living near a petrochemical complex’, Journal of Exposure Science and Environmental Epidemiology, 2015) den nan estudio hasí na un refineria na Taiwan. E investigadónan akí a komprobá komo e promé sientífikonan un relashon entre e nivel di vanadio den orina di habitantenan i e distansha di nan kas te e kompleho petrokímiko. Nan a komprobá ku tin un ‘distance-to-source gradient in V [vanadium] and As exposures exists for residents living near a petrochemical complex’. E konklushon akí ta konforme e espektativa ku SMOC ta atvertí p’e pa añanan largu kaba. Mas serka hende ta biba pabou di e tereno di Isla, mas haltu e nivel di vanadio den nan kurpa. Esaki tin konsekuensha grave pa salú di hende, asta e por kousa chèns di kanser i un desaroyo desviante. Manera ta konosí e chèpèchèpè bèrdè riba kas bou di huma di Isla tambe ta riku na vanadio.