Minister Plasterk resientemente a risibí preguntanan den Parlamento hulandes tokante Isla. Bosman (VVD) ta prekupá pa Isla. E no ke pa Hulanda tin ku paga pa e pipa di gas di Venesuela pa Kòrsou, si esaki realisá. Plasterk ta di akuerdo ku e punto di bista akí di Bosman. Aki por lesa su kontestanan:
antwoordopvragenbosmangaspijpislavenezuela11oktober2016.
Chèns ku Bosman ta bai hasi preguntanan parlamentario tokante e impakto shushou di Isla, na unda ta violá derecho humano severamente, ta mes grandi ku gai ta bai pone webu. Ai nò, ta otro miembro parlamentario ta forma moketa pa esaki. Por ehèmpel van Laar (PvdA). Su preguntanan di dos siman pasá tokante seramentu di Juan Pablo vsbo pa motibu di holó stinki tambe a wòrdu kontestá pa Plasterk. Den e preguntanan parlamentario akí (Kamervragen ) van Laar ta mustra riba e moshon di 10 februari 2016 kaminda Parlamento hulandes a konstatá violashon di derecho humano i mal maneho (pasobra no ta mantené palabrashonnan) i kaminda a disidí ku e emishon mester a baha supstanshalmente denter di tres luna. No a logra hasi esaki, manera seramentu fòrsá di Juan Pablo Duarte vsbo a mustra. Van Laar a atmití esaki tambe den e debate parlamentario di siman pasá. Pa motibu di flohera Plasterk no ke reakshoná riba mayoria di pregunta di van Laar. Tokante mantenshon di e moshon Plasterk ta skirbi:
,,Manera mi a duna Parlamento hulandes di konosé kaba, ta ora Kòrsou ta pidi, – basá riba e moshon konserní – mi ministerio entre otro lo asistí Kòrsou pa inspektá e refineria, bou di responsabilidat di e outoridatnan di Kòrsou. Basá riba e inspekshon akí, nos lo por disidí kua medida na término kòrtiku por tuma pa baha e emishon di Isla. Sin resultado di inspekshon no ta posibel pa tuma medida dirigí. E asistensha ta relashoná konkretamente ku hürmentu di ekspertisia eksterno di refinashon. E prosedura di kontratashon nesesario pa esei, ku a tuma lugá segun regla formal di kontratashon di Kòrsou, a kaba di sera i mientrastantu ya a duna òrdu pa e trabounan formalmente.
Preparashon i planifikashon di e inspekshon ta tumando lugá. Denter di algun luna, e resultadonan lo ta konosí. Banda di esei, si nan ke, nos ta ofresé asistensha riba tereno di modernisashon di lei i regulashon.”
Gobièrnu di Kòrsou ya a pidi apoyo pa modernisá lei i regulashon? Nò. Mientrastantu nos tin ku warda resultado di inspekshon. Antó? Mantenshon? Te dia di awe, niun gobièrnu di Kòrsou no a hasi esei, meskos ku dos siman pasá. Outoridat a duna siudadano i empresario konseho pa sera bentana i porta; anto Isla por a sigui gruña manera semper; habitantenan bou di huma ya ta paga e preis máksimo pa desenio bieu. Nò, Plasterk ta preferá saka un bolada. Tin mester di algu mas fuerte, es desir art. 43 (insiso 2) di Statüt di Reino Hulandes, pa pèrkurá ku ta bai lanta un servisio ambiental outónomo ku ta bai mantené di bèrdat, ku ta bai obligá Isla di usa kombustibel mas limpi. Djis un medida na plaso korto ku no tin mester di inspekshon p’e, ku ta baha e molèster sin ku Isla tin ku sera porta, ai nò, Plasterk sa esei dia bieu kaba. Lesa su kontesta aki: antwoordopvragenvanlaar10oktober2016.
