Esaki no a pasa niun hende forbei: e kimamentu na Isla dia 21 di mei último. Korant na Hulanda i na Kòrsou i tambe medionan internashonal a dediká ampliamente atenshon na e sigaria kanseroso di mas grandi na Reino Hulandes: refineria Isla. Anto pa kolmo resientemente gobièrnu di Kòrsou a deklará, entre otro den Antilliaans Dagblad, ku Isla no ta tene su mes na e lisensia di medioambiente. Pa SMOC esaki no tabata niun sorpresa ètòl, ni tampoko e kandela riba tereno di Isla. Aksidente sa pasa riba e tereno di Isla, i lo sigui pasa si nan no ta mantené maneho. Polítikonan mester lucha, spesialmente pa e habitantenan bou di huma di Isla pa e mantenshon ehekutivo di Isla, pero tambe pa interes di Kòrsou en general. Parlamentarionan na Hulanda di D66 supuestamente ta komprondé esaki. Awe nan a entregá un lista largu di pregunta na parlamento hulandes. Ta di spera ku parlamentarionan di Kòrsou tambe ta bai interpelá.

Akibou por lesa e interpelashon di D66.

2017Z07199

Pregunta di e parlamentarionan Diertens, Van Eijs ku Van Veldhoven (tur D66) pa minister di Asuntunan Interior ku Relashonnan den Reino i pa Sekretario di Estado di Infrastruktura ku Medioambiente tokante e kimamentu na refineria Isla na Kòrsou (mandá dia 31 di mei 2017).

1. Bo konosé e relatonan ‘Isla tast nog in het duister’, ‘brand in olieraffinaderij Isla’ i e relato di inspekshon di Isla? 1)

2. Kon i ken ta investigá si e kimamentu a kousa materia dañoso ku por afektá salubridat di e hendenan bibá eibanda?

3. Kiko ta e ‘promé investigashon’ ku e mandatarionan lokal i e bosero di Isla ta referí na dje, ora nan ta bisa ku no tin riesgo pa salubridat di pueblo komo konsekuensha di e kimamentu?

4. Bo por indiká si ta konosí si e hilu di humanan kousá pa e kimamentu ta kontené mas materia fini ku normalmente, ku konsekuensha dañoso ora di hala rosea? Si ta asina, dikon no a konta esaki komo riesgo pa salubridat di pueblo?

5. Segun e bosero di Isla, e kandela a originá na e Crude Distiller i ta gasolin so a kima; por deskartá ku, durante e kimamentu, otro kombustibel a kima òf a evaporá, ku por a kousa por ehèmpel hidrokarburo orgániko pasahero manera benseno kanseroso?

6. E bosero di Isla ta indiká ku no tin nodi pa preokupá, pasobra e materianan ku a sali tambe ta wòrdu kimá ora di ‘flaring’ (kima gas di mas); bo por afirmá ku ora di ‘flaring’ na Isla por emití materia dañoso? Por tin un subida di e kantidat di e materianan akí durante un kimamentu?

7. Kon i ki ora gobièrnu di Kòrsou i gerensia di Isla a notifiká e habitantenan rondó refineria Isla di e kimamentu? Kon ta verifiká si tur komunikashon, ku e habitantenan a risibí tokante e riesgo di salubridat, ta korekto?

8. Kon i ken ta investigá e kousa di e kimamentu? Ta Isla so ta investigá esaki, òf tin organisashon eksterno envolví? Si ta asina, ta kua organisashon?

9. Kuantu biaha den pasado tabatin insidente di seguridat na Isla i kon esaki ta relashoná ku refineria rònt mundu? Por papia di un problema struktural di seguridat? Si no t’asina, dikon nò?

10. Kiko bo ta haña di e echo ku segun e rapòrt di inspekshon di Isla, bou di guia di Fluor, ta parse ku refineria Isla ta aserká problema di medioambiente solamente for di e riesgo di ‘violá e eksigenshanan mará na pèrmit’ en bes di usa un aserkashon genériko kaminda ta tradusí daño na medioambiente den gastunan?

11. For di rapòrt di inspekshon di Fluor ta sali na kla ku refineria Isla no ta kumpli ku e eksigenshanan di e pèrmit aktual, riba vários punto, entre otro e ‘flaring’ struktural; ta konosí kuantu tempu kaba Isla no ta kumpli ku e eksegenshanan di pèrmit akí? Si no t’asina, dikon nò?

12. E rapòrt di inspekshon di Fluor ta duna vários sugerensha, tantu pa término korto ku pa término largu, pa Isla sí por kumpli ku e eksegenshanan di pèrmit; bo por indiká kon i ki ora gobièrnu di Kòrsou ta mantené ku Isla ta sigui i ta implementá e sugerenshanan di e rapòrt di inspekshon di bèrdat?

13. Kiko gobièrnu di Kòrsou a hasi te awe pa mantené e violashonnan di refineria Isla i pa pèrkurá ku refineria Isla ta bai tene su mes na e eksegenshanan mínimo di pèrmit?

14. Ki dia gobièrnu di Kòrsou lo ehekutá un inspekshon atrobe i evaluá si refineria Isla sí a sigui i implementá e sugerenshanan di e rapòrt di inspekshon di Fluor, i sí ta kumpli ku tur eksigensha di pèrmit?

15. Si refineria Isla keda sin kumpli i keda violá lei i regla vigente, ki ora gobièrnu di Kòrsou lo karga e konsekuensha i ta bai para e operashonnan òf ta kuminsá parti but? Kua kuadro lo usa pa esei?

16. E servisionan di inspekshon hulandes relevante, manera Inspectie Leefomgeving en Transport (ILT), tin sufisiente kapasidat pa ofresé gobièrnu di Kòrsou nan konosementu, perisia, i eksperensia tokante kon ta mantené na un bon manera? Si no t’asina, dikon nò? Ora sí t’asina bo ta dispuesto pa hasi e oferta akí na gobièrnu di Kòrsou?

17. Bo por kontestá kada pregunta apart, por fabor?