Mirando notisia di e último dianan, ta komosifuera fundashon SMOC ta eksigí 75 mion florin di Isla i ta peligrá futuro di Isla. E notisianan akí ta leu for di bèrdat. SMOC ta informá loke ta e kaso eksaktamente.

SMOC TA UN DI E 26 DEMANDANTENAN DI 75 MION FLORIN

E kaso di 75 mion florin ta un kaso di e demandante prinsipal Stichting Humanitaire Zorg i demandantenan sekundario: SMOC i 24 habitante (4 ta hulandes europeo, 20 ta yu di Kòrsou), di kua mientrastantu 1 habitante a fayesé pa motibu di kanser.

KIKO SMOC TA?

SMOC ta un fundashon, lantá na 2003 ku tin un solo meta: airu limpi pa tur habitante bou di huma di Isla ku BOO. SMOC no ta pro seramentu di Isla. SMOC ta konsistí di boluntario ku no tin niun interes, ku no ke kumpra niun pida di tereno i ku tampoko no ta wòrdu pagá pa hasi e trabou boluntariamente. Sí, e redunan akí t’ei, pero nan no tin ningun base di bèrdat. SMOC ta yuda e habitantenan bou dje huma, bishitando, skuchando i dunando nan informashon i konseho. Direktiva di SMOC ta konsistí di hende profeshonal: un dòkter di kas, un ingeniero kímiko i un botikario. Ekspertonan riba tereno di refineria ta sostené SMOC, tur ta hasi esaki sin interes propio.

DIKON ISLA MESTER PAGA E BUT DI 75 MION FLORIN

Si Isla tin ku paga 75 mion florin, ta pasobra korte di apelashon na 2010 a dikta e but ei. But ku por imponé solamente si Isla ta emití mas dióksido di suafel ku ta pèrmití, netamente pasobra esaki ta masha dañino pa salubiridat. Isla ta na altura di esaki pa 8 aña kaba. Desde 2010 e emishon di dióksido di suafel akí no a mengua, al kontrali, el a subi, i eksperto a konstatá ku Isla a emití mas dióksido di suafel ku ta pèrmití. E demandentenan a disidí di tené Isla na e multa.

ISLA POR PAGA 75 MION FLORIN?

Korte a disidí ku e but ta 75 mion florin. Esaki ta un montante enorme, pero segun korte e no ta asina haltu ku e ta trese Isla den problema finansiero. Ta trata solamente un ganashi di Isla di algun dia òf siman. Ademas, e but su meta ta pa pèrkurá ku Isla ta hasi tur su esfuerso pa disminuí e emishon di dióksido di suafel. Esaki no a tuma lugá i e kehonan di e habitantenan a krese enormemente. SMOC no ta menasá funshonamente ni eksistensha di Isla.

KIKO TA BAI SOSODÉ KU E PLAKA KU ISLA MESTER PAGA?

Si Isla mester paga, fundashon SMOC lo risibí un kantidat di masoménos 2 mion florin. Pues, e otro demandentenan lo risibí sobrá, esta masoménos 72 mion florin. Ni un hende di SMOC lo risibí e plaka akí, sino e fundashon. Si SMOC ta risibí e plaka, SMOC lo utilisá kompletamente pa e úniko meta di SMOC: airu limpi. Por hasi esaki yudando e habitantenan bou dje huma, por ehèmpel ku èrko, ku limpiamentu di e shushi bèrdè, yudansa ku aporte médiko, pagamentu di remedi, etcetera. Si Isla tin ku kumpli ku e but, un notario lo prokurá ku e masoménos 2 mion florin ku SMOC komo un di e demandantenan lo risibí, ta kompletamente pa bienestar di e hendenan bibá rònt di Isla.

Pa konkluí: SMOC no ta interesá den plaka pa su boluntarionan, ni den su propio interes, ni den pida di terenobou di huma, ni den seramentu di Isla. Kada akusashon paresido dirigí na SMOC ta falsu, ta kalumnia.

Na nòmber di direktiva di SMOC,

Drs Peter van Leeuwen

Drs Arjan Linthorst

Wak abou pa figura di Dr. Erin Pulster!